Livandagi «Hizbulloh» harakati yetakchisi Hasan Nasrulloh bayonot bilan chiqish qildi — bu uning Isroil va HAMAS o‘rtasida urush boshlangan 7 oktyabrdan buyon ilk bayonoti bo‘ldi. U «HAMASdagi birodarlar»ning harakatlarini olqishladi, shu bilan birga guruh Isroilga hujum qilishdan oldin o‘z rejalarini «Hizbulloh» bilan bo‘lishmagani va bu «100 foizga falastinlarning o‘zining operatsiyasi» bo‘lganini ta’kidladi.
Ayrim tahlilchilar Nasrulloh o‘zining oldindan shov-shuv bilan anons qilingan chiqishida Livan hududidan turib Isroilga qarshi keng ko‘lamli harbiy harakatlar boshlanishi haqida e’lon qilishini kutgandi, ammo u bunday qilmadi. U «Hizbulloh» HAMASning Isroilga qarshi urushiga 8 oktyabr kuni, urush boshlangan kunning ertasigayoq qo‘shilganini aytdi.
Hasan Nasrulloh yana nimalar dedi?
Livandagi radikal guruh rahbari HAMASni maqtagan va G‘azodagi urush uchun mas’uliyatni AQSh zimmasiga yuklab, Isroilni «shunchaki qatl quroli» deb atagan.
Qo‘shma Shtatlar «o‘t ochishni va tajovuzni to‘xtatish»ga qarshilik ko‘rsatmoqda, deya qo‘shimcha qilgan Nasrulloh.
«Ushbu shonli, keng ko‘lamli amaliyot xavfsizlik, harbiy ishlar, siyosat, diplomatiya va hatto psixologik jihatdan zilzila keltirib chiqardi, - degan Hasan Nasrulloh. - U chuqur strategik oqibatlarga ega bo‘ladi».
«Hizbulloh» yetakchisi «G‘azo sektoridagi shahidlarning oilalari»ga hamdardlik bildirgan va Yaman va Iroqdagi HAMASning Isroilga qarshi urushiga qo‘shilganini e’lon qilgan guruhlarning harakatlarini olqishlagan.
Nasrulloh «Hizbulloh» jangni 8 oktyabr kuni, HAMAS kutilmaganda Isroilga hujum qilganining ertasiga boshlaganini bildirgan.
U Livan chegarasi bo‘ylab isroillik kuchlar bilan har kungi otishmalarni «1948 yildan buyon misli ko‘rilmagan» deb atagan.
«Chegarada bo‘layotgan voqealar kamtarona ko‘rinishi mumkin, ammo u juda muhim ahamiyatga ega.
Biz har kuni isroillik askarlar, tanklar va dronlarga hujum qilmoqdamiz. Biz haqiqiy janglarga qo‘shilganmiz. Shahidlarimiz ham — 57 nafar — buni tasdiqlaydi, — degan Nasrulloh. — Bizning chegaradagi amaliyotimiz Isroil armiyasini G‘azo va G‘arbiy sohildan kuchlar va qurollarni Livan frontiga tashlashga majbur qiladi».
U shuningdek neft eksport qiluvchi arab mamlakatlarini Isroilga mahsulot yetkazib berishni to‘xtatishga chaqirgan.
