Surxondaryoda o‘zgalar nomiga 132 mln so‘m kredit olgan hokim yordamchisi aniqlandi

Surxondaryo viloyati, Qumqo‘rg‘on tumani, «To‘da» mahallasidagi hokim yordamchisi tadbirkorlik faoliyati doirasida o‘zgalar nomiga kredit rasmiylashtirgani ma’lum bo‘ldi. Bu haqda Surxondaryo viloyati prokuraturasi xabar berdi. 

Qayd qilinishicha, hokim yordamchisi tadbirkorlik faoliyati bilan ham shug‘ullangan va o‘zi ta’sis qilgan «Volunteer team» korxonasida bir qancha fuqarolarni aldab, elektron imzolarini qo‘lga kiritib, nomiga issiqxona faoliyati tashkil etish uchun 4 marotaba 33 mln so‘mdan, jami 132 mln so‘m kredit ajratilishiga erishgan. So‘ngra pullarni o‘zi rahbarlik qilayotgan jamiyat hisobiga tushirib, ehtiyojlariga ishlatib yuborgan. 

Holat yuzasidan Jinoyat Kodeksining 168-moddasi (firibgarlik) 3-qismi, «b, v» bandlari bilan jinoyat ishi qo‘zg‘atilgan. 

Qayd qilinishicha, u 31 oktyabr kuni hokim yordamchisi lavozimidan ozod qilingan.