O‘zbekiston va Qozog‘iston savdodagi to‘siqlarni bartaraf etish bo‘yicha ishchi guruh tuzadi

Joriy yilning 5 yanvar kuni investitsiyalar, sanoat va savdo vaziri Laziz Qudratov va Qozog‘iston Respublikasi savdo va integratsiya vaziri Arman Shakkaliyev o‘rtasida uchrashuv bo‘lib o‘tdi.

Uchrashuv davomida Qozog‘iston prezidenti Qosim-Jo‘mart To‘qayevning O‘zbekistonga tashrifi doirasida imzolangan sarmoyaviy bitimlar va savdo shartnomalarini amalga oshirish «Yo‘l xaritasi» bo‘yicha amalda olib borilayotgan ishlar, ikki mamlakat o‘rtasidagi savdo-iqtisodiy va sanoat kooperatsiyasini yanada rivojlantirish istiqbollari va joriy loyihalarni amalga oshirishning dolzarb masalalari muhokama qilindi.

O‘zaro savdo hajmining o‘sishi ta’kidlab o‘tildi. So‘nggi 6 yil ichida tovar ayirboshlash hajmi qariyb 2,5 barobar oshib, 2016 yildagi 1,9 milliard dollar 2023 yilda 4,6 milliard dollardan oshdi. Shu bilan birga, foydalanilmagan imkoniyatlar mavjudligini ta’kidlagan holda, tomonlar yaqin yillarda tovar ayirboshlash hajmini 10 milliard dollarga yetkazish bo‘yicha qator chora-tadbirlarni amalga oshirishni kelishib oldi.

Xususan, o‘zaro savdodagi to‘siqlarni bartaraf etish bo‘yicha qo‘shma ishchi guruh tuzish masalasi kelishib olindi. Tomonlar, shuningdek, ikki mamlakat bozorlarida keng turdagi tovarlarni sotish uchun onlayn savdo maydonchasini o‘z ichiga olgan UzKazTrade qo‘shma tashqi savdo kompaniyasi faoliyatini qo‘llab-quvvatlashga tayyor ekanliklarini bildirdi.

«Markaziy Osiyo» sanoat kooperatsiyasi xalqaro markazi faoliyatini tashkil etishning amaliy jihatlarini hisobga olgan holda sanoat kooperatsiyasini rivojlantirish yuzasidan konstruktiv fikr almashildi. Markazni tashkil etish va foydalanishga topshirishni jadallashtirish bo‘yicha qo‘shma chora-tadbirlar ko‘rish bo‘yicha kelishuvga erishildi.

Uchrashuv yakuni bo‘yicha tomonlar ikki tomonlama ko‘p qirrali munosabatlarni yanada rivojlantirish tarafdori ekanliklarini tasdiqladi va erishilgan kelishuvlarni jadal amalga oshirish bo‘yicha mas’ul rahbarlarga topshiriqlar berdi.