Qozogʻiston, Oʻzbekiston va Birlashgan Arab Amirliklari yangi Qozogʻiston - Oʻzbekiston - Afgʻoniston - Pokiston (CASA) temiryoʻl yoʻnalishi loyihasini birgalikda tayyorlashga kelishib oldi. Ushbu loyiha Pokiston dengiz portlariga chiqish imkonini berishi nazarda tutilmoqda.
Qozogʻiston bosh vaziri matbuot xizmati xabariga koʻra, tegishli oʻzaro anglashuv memorandumini Oʻzbekiston va Qozogʻiston Transport vazirliklari hamda BAA Energetika va infratuzilma vazirligi vakillari imzoladi.
CASA loyihasi Markaziy va Janubiy Osiyo oʻrtasidagi transport aloqalarini mustahkamlash, shuningdek, xalqaro yuk tashuvlari, savdo, logistika va investitsiyaviy hamkorlikni rivojlantirish uchun yangi imkoniyatlar yaratishga qaratilgani taʼkidlangan.
Hujjatga koʻra, tomonlar yaqin orada texnik va iqtisodiy tadqiqotlar hamda tahliliy baholashni oʻtkazishi, zarur temiryoʻl infratuzilmasi va unga aloqador obyektlarni qurish maqsadga muvofiqligini oʻrganishi kerak. Shuningdek, loyihaning texnik, iqtisodiy va moliyaviy jihatlarini atroflicha ishlab chiqish uchun maxsus ishchi guruh tuzish rejalashtirilmoqda.
Taʼkidlanishicha, Markaziy Osiyo davlatlari rivojlangan temiryoʻl tarmogʻi va yuqori tranzit salohiyatiga ega boʻlsa, BAA tomoni yirik infratuzilma va logistika loyihalarini moliyalashtirish hamda amalga oshirish boʻyicha xalqaro tajribasini safarbar etadi.
Ushbu imkoniyatlarning birlashishi CASA loyihasini amaliy bosqichga oʻtkazish va uni amalga oshirishning eng maqbul mexanizmlarini belgilab olishga xizmat qilishi kutilmoqda.
