O‘rmonlarda yong‘in xavfsizligi talablarini buzganlik uchun ma’muriy javobgarlik belgilanadi 

Senatning Mudofaa va xavfsizlik masalalari qo‘mitasi majlisida Ma’muriy javobgarlik to‘g‘risidagi kodeksga yong‘inlar profilaktikasi samaradorligini oshirishga qaratilgan qo‘shimcha va o‘zgartirishlar kiritishni nazarda tutuvchi qonun muhokama qilindi. 

Ma’lum qilinishicha, yong‘inlarning oldini olish sohasida tizimli chora-tadbirlar amalga oshirilayotganligiga qaramasdan, yong‘inlar bilan bog‘liq og‘ir oqibatli noxush hodisalar ro‘y bermoqda.

Jumladan, 2023 yilda 10 204 ta yong‘in hodisasi yuz berib, unda 251 nafar fuqaro jabrlangan, shundan 79 nafari vafot etgan, shuningdek, jismoniy va yuridik shaxslarga 270,4 mlrd so‘mlik zarar yetkazilgan. Shundan faqatgina 2023 yilning o‘zida tadbirkorlik sub’yektlariga tegishli obektlarda 797 ta yong‘in sodir bo‘lgan.

Majlisda ayrim fuqarolarning yong‘in xavfsizligi qoidalarini bilmasligi, aksariyat hollarda ushbu qoidalarga e’tiborsizlik bilan qarashi, shuningdek, amaldagi qonunchilikda qonunbuzilish holatlari uchun yengil ma’muriy jazo choralari belgilanganligi yirik yong‘inlar sodir bo‘lishining asosiy sabablaridan bo‘layotgani ta’kidlangan. Hududlarda ro‘y bergan yirik yong‘inlar sabablarini o‘rganish bo‘yicha tuzilgan Hukumat komissiyasi qayd etishicha, davlat yong‘in nazorati organlarining vakolatlari yetarli emasligi sababli ular tomonidan yong‘inning oldini olish bo‘yicha ta’sirchan choralar ko‘rilmasdan qolmoqda. 

Muhokama qilingan qonun bilan Ma’muriy javobgarlik to‘g‘risidagi kodeksga o‘rmonlarda yong‘in xavfsizligi talablarini buzish yong‘in chiqishiga olib kelganligi uchun ma’muriy javobgarlik belgilashni, shaxslarning ehtiyotsizligi yoki yong‘in xavfsizligi qoidalarini buzganligi tufayli uy-joy fondida odamlarning sog‘lig‘iga zarar yetishi yoxud o‘zganing mol-mulki shikastlanishi yoki uning yo‘q qilinishi bilan bog‘liq bo‘lmagan tarzda yong‘in sodir bo‘lganda bunday shaxslarni javobgarlikdan ozod qilishni nazarda tutuvchi o‘zgartirishlar kiritilmoqda.