O‘zbekistonda davlat organlari rahbarlari KPI asosida mukofotlanadi yoki ishdan bo‘shatiladi

Agentlikning ma’lum qilishicha, O‘zbekiston prezidentining "Respublika va mahalliy ijro etuvchi hokimiyat organlari hamda xo‘jalik birlashmalari faoliyati samaradorligini baholash tizimini takomillashtirish chora-tadbirlari to‘g‘risida"gi farmoniga ko‘ra, eng muhim samaradorlik ko‘rsatkichlari (KPI), ularga erishish bo‘yicha "yo‘l xaritalari" hamda ular tomonidan hududlarda amalga oshiriladigan chora-tadbirlar dasturi hukumat tomonidan tasdiqlanadi.

"Samaradorlik ko‘rsatkichlari bajarilishi to‘g‘risidagi ma’lumot har chorakda samaradorlik.uz elektron platformasiga kiritiladi hamda unda rahbarlar va ularning o‘rinbosarlari faoliyatining samaradorligi reytingi shakllanadi", – deyiladi maqolada.

Har bir samaradorlik ko‘rsatkichiga belgilanadigan salmoq o‘lchovi yig‘indisidan kelib chiqib, samaradorlik ko‘rsatkichlari ular bajarilishi 70 foizdan kam bo‘lganda – "qoniqarsiz", 70 foizdan 85 foizgacha – "qoniqarli", 85 foizdan 100 foizgacha – "yaxshi" hamda 100 foiz va undan yuqori bo‘lganda "a’lo" deb baholanadi.

"Qayd etish kerakki, chorak yakuni bo‘yicha samaradorlik ko‘rsatkichlariga erishish natijalari "qoniqarsiz" deb baholangan rahbarlar va ularning o‘rinbosarlariga rag‘batlantirish to‘lovlari kelgusi 3 oy uchun to‘xtatiladi va ularga nisbatan intizomiy ta’sir choralarini qo‘llash masalasi ko‘rib chiqiladi", – deya ta’kidlagan Asia-Plus.