Prezident Shavkat Mirziyoyev davlat fuqarolik xizmatchilari oylik ish haqi tizimi va mehnatga haq to‘lash shartlarini takomillashtirish bo‘yicha takliflar taqdimoti bilan tanishdi.
Qayd etilishicha, bugungi kunda davlat xizmatchilari mehnatiga haq to‘lash sohasini tartibga soluvchi yagona huquqiy hujjat mavjud emas. Turli davlat organlarida mehnatga haq to‘lash tartibini belgilaydigan 50 dan ortiq alohida normativ-huquqiy hujjat amal qilmoqda.
Shu munosabat bilan davlat fuqarolik xizmatchilari uchun yagona, ochiq va natijaga asoslangan mehnatga haq to‘lash tizimini joriy etish taklif qilindi. Yangi tizim 54 ming nafar davlat xizmatchisini qamrab olishi rejalashtirilgan.
Takliflarga muvofiq, davlat organlari milliy, respublika, hududiy hamda tuman va shahar darajalariga ajratiladi. Xodimlar esa bajaradigan vazifalariga qarab ma’muriy boshqaruv, asosiy va qo‘llab-quvvatlash guruhlariga bo‘linadi.
Xalqaro tajriba asosida 11 ta razryad va 6 ta pog‘onadan iborat yangi ish haqi setkasini joriy etish ko‘zda tutilmoqda. Shuningdek, hozirgi vaqtda qo‘llanilayotgan o‘ndan ortiq turli ustama va mukofotlar o‘rniga uchta asosiy rag‘batlantirish to‘lovi joriy etiladi.
Jumladan, xodimlarning malaka darajasi, funksional vazifalarni bajarishi, ijro intizomi, mehnat intizomi va tashabbuskorligi KPI asosida baholanib, ularga tegishli ustamalar to‘lanadi.
Bundan tashqari, muhim va murakkab vazifalarni bajargan, innovatsion yondashuvlarni joriy etgan hamda yuqori natijaga erishgan davlat xizmatchilariga hisobot davri yakuni bo‘yicha bonus to‘lovlari berish ham nazarda tutilmoqda.
