Toshkentda Malibu-2, Lacetti va LADA to‘qnashishi oqibatida bir kishi vafot etdi

Chilonzor tumani Bunyodkor ko‘chasida yuz bergan YTHda Malibu-2 haydovchisi voqea joyida hayotdan ko‘z yumgan.

Foto: Videodan kadr

Joriy yilning 13 iyun kuni soat 01:00 larda Chilonzor tumani Bunyodkor ko‘chasida odam o‘limi bilan yakun topgan yo‘l-transport hodisasi sodir bo‘ldi.

Toshkent shahar IIBB YHXB xabariga ko‘ra, 1997 yilda tug‘ilgan haydovchi M.A. boshqaruvida bo‘lgan Malibu-2 rusumli avtomashina, 1992 yilda tug‘ilgan haydovchi A.Z. boshqaruvida bo‘lgan Lacetti rusumli avtomashina hamda 1991 yilda tug‘ilgan haydovchi P.L. boshqaruvidagi bo‘lgan LADA rusumli avtomashina ishtirokida yo‘l-transport hodisasi kuzatilgan.

YTH oqibatida Malibu-2 avtomashina haydovchisi olgan tan jarohatlari natijasida voqea joyida vafot etgan.

Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Tergov davom etmoqda.