Chexiyadagi harbiy poligonda portlash: harbiy xizmatchi halok bo‘ldi

17 iyun, dushanba kuni Chexiya sharqidagi Libav harbiy poligonida portlash sodir bo‘ldi, natijada, yangilangan ma’lumotlarga ko‘ra, bir askar halok bo‘ldi. Bundan tashqari, sakkiz kishi yaralangan - yetti harbiy va bir fuqaro. Ikki yarador tez yordam yordamida kasalxonaga yetkazilgan.

«Biz Libavdagi mashg‘ulot hududida jiddiy hodisa bilan shug‘ullanmoqdamiz, u yerda hozircha noma’lum turdagi o‘q-dorilar portlab ketgan, afsuski, voqea joyida qurbonlar bor», — deb xabar berdi Chexiya armiyasi X ijtimoiy tarmog‘ida. Voqea harbiy politsiya tomonidan tekshirilmoqda.

Libav poligoni Olomouts shahri yaqinida, Pragadan taxminan 250 kilometr sharqda joylashgan. U 1949 yildan beri faoliyat yuritadi, maydoni taxminan 235,5 kvadrat kilometrni tashkil etadi, deb xabar beradi Chexiyaning Idnes axborot portali. 2022 yildan boshlab Libavdagi poligonda Chexiya va Ukraina armiyasi harbiy xizmatchilarining qo‘shma mashg‘ulotlari o‘tkazilmoqda. Portlash mashg‘ulotlar vaqtida yuz bergani masalasi hozircha noma’lum. 

Vrbetitsadagi o‘q-dori omborlarida portlashlar 

2014 yilning oktyabr va dekabr oylarida Vrbetitsa qishlog‘idagi qurol-yarog‘ omborlarida portlashlar sodir bo‘ldi. Natijada Chexiyaning ikki fuqarosi halok bo‘ldi va Praga ma’lumotlariga ko‘ra, 1 milliard chex kronasi miqdorida zarar yetkazildi. 

2021 yil aprel oyida Chexiyaning o‘sha paytdagi bosh vaziri Andrey Babish va mamlakat tashqi ishlar vaziri Yan Gamachek Rossiya harbiy razvedkasining portlashlarga aloqadorligi haqidagi dalillarni ma’lum qildi. Shu munosabat bilan Praga 18 nafar rossiyalik diplomatni chiqarib yubordi. Moskva, o‘z navbatida, o‘ziga qo‘yilgan barcha ayblovlarni rad etib, 20 nafar chex diplomati chiqarib yuborilganini e’lon qildi. 

Chexiya bilan birdamlik belgisi sifatida Slovakiya, Litva, Latviya va Estoniya ham rus diplomatlarini chiqarib yubordi. Bolgariya Rossiyaning Sofiyadagi elchixonasi xodimlaridan birini 2011 yildan 2020 yilgacha harbiy omborlar va zavodlarda sodir bo‘lgan to‘rtta portlashda Rossiya maxsus xizmatlarining aloqadorligi gumoni bilan bog‘liq holda persona non grata deb e’lon qildi.