Вазирлар Маҳкамаси ҳузуридаги Миграция агентлиги директори Беҳзод Мусаев бошчилигидаги делегациянинг Чехияга амалга оширган хизмат сафари доирасида меҳнат миграциясини ривожлантириш ва ўзбекистонлик мутахассисларни ишга жойлаштириш масалалари муҳокама қилинди.
Чехия Соғлиқни сақлаш вазири Адам Войтех билан бўлиб ўтган музокаралар якунида тиббиёт соҳасида пилот лойиҳани амалга ошириш ва қўшма «Йўл харитаси»ни ишлаб чиқиш бўйича ўзаро англашув меморандуми имзоланди.
Қайд этилишича, Чехия соғлиқни сақлаш тизимида дастлабки босқичда 400 нафарга яқин ҳамшира ва ижтимоий ходимга эҳтиёж мавжуд.
Шунингдек, Марказий Европанинг йирик хусусий тиббиёт тармоқларидан бири бўлган Penta Hospitals International компанияси билан ҳам меморандум имзоланди. Ҳужжат ўзбекистонлик кадрларни Чехия, Словакия ва Полшадаги шифохоналарга ишга жойлаштиришни назарда тутади.
Ташриф давомида Чехия Савдо палатаси ҳамда MONTO, s.r.o. ва TOPSEARCH, s.r.o. компаниялари раҳбарияти билан ҳам учрашувлар ўтказилди. Унда саноат, автомобильсозлик, логистика ва транспорт соҳаларига ўзбекистонлик мутахассисларни жалб қилиш масалалари муҳокама қилинди.
Музокаралар якунида чех иш берувчиларининг эҳтиёжларидан келиб чиқиб, фуқароларни Ўзбекистоннинг ўзида туриб чех тили ва талаб юқори бўлган касбларга ўқитиш, шунингдек, иш берувчилар билан тўғридан тўғри ҳамкорлик механизмларини йўлга қўйиш бўйича муҳим келишувларга эришилди.
