Qirg‘izistonda davlat xizmatchilarining maoshini oshirishga moratoriy joriy qilindi

Qirg‘iziston prezidenti Sadir Japarov davlat xizmatchilarining maoshini oshirishga moratoriy joriy qildi. Bu haqda 24.kg xabar berdi.

Moratoriy 2026 yilgacha joriy qilingan. Qayd etilishicha, mazkur qaror davlat budjeti xarajatlarini optimallashtirish maqsadida qabul qilingan.

Qaror bilan davlat idoralari, qo‘mitalari, prezidentning viloyatlardagi vakolatxonalari, shuningdek, mahalliy hokimiyat organlari xodimlarining ish haqini oshirishga taqiq joriy etildi. Shuningdek, davlat organlarining shtatini kengaytirishga ham taqiq joriy etilgan.

Shu bilan birga, davlat xizmatchilarining ish haqini, shuningdek, shtat tarkibini o‘zgartirish alohida hollarda davlat rahbarining maxsus qarori bilan amalga oshirilishi mumkin.

Prezident va Vazirlar Mahkamasi qarorlari ijrosini nazorat qilish boshqarmasi moratoriyning amal qilishini nazorat qilishi shart.