O‘zbekistonda qishloq xo‘jaligi mahsulotlarining Hindistonga eksporti ortadi

Mamlakat elchixonasi ko‘magida Hindistonning Groceries Impex kompaniyasi asoschisi Vipin Aggarval boshchiligidagi delegatsiyaning O‘zbekistonga amaliy safari tashkil etildi.

Foto: "Dunyo" AA

Hindistonlik ishbilarmonlar tashrif doirasida Jizzax viloyatida BMB Za'faron korxonasi faoliyati bilan tanishdi. Xususan, korxona tarkibidagi plantatsiyada amalga oshirilayotgan ishlar, za’faron gullarini terish, saralash, quritish va qadoqlash jarayonini bevosita kuzatdi.

Mehmonlar BMB-NRC Agrologistics va BMB Agro Plus korxonalarida ham bo‘ldi. Vipin Aggarval bu yerda qishloq xo‘jaligi mahsulotlarini yetishtirishdan tortib ularni chuqur qayta ishlashgacha bo‘lgan to‘liq zanjir tashkil etilganini yuqori baholadi. Za’faron va boshqa mahsulotlarni quritish, qayta ishlash, xorijiy bozorlarga eksport qilish bo‘yicha yaqin sheriklik aloqalarini rivojlantirishdan manfaatdorlik bildirdi.

Tomonlar O‘zbekistonda yetishtirilgan za’faron, tabiiy meva-sabzavotlardan tayyorlangan tayyor va quritilgan mahsulotlarning Hindistonga eksportini faollashtirishda hamkorlik qilish bo‘yicha kelishib oldi.