Kun.uz tanqididan so‘ng: Yangiyo‘l sudyasining shubhali hukmiga prokuratura protest kiritdi

Toshkent viloyat prokuraturasi tomonidan JIB Yangiyo‘l tuman sudining 2024 yil 11 noyabrdagi Rustamjon Mirzaxatamovga nisbatan hukmiga kassatsiya tartibida protest kiritildi. Prokuratura hukmning qonuniyligini o‘rganib chiqqan. Bu haqda Kun.uz'ga Bosh prokuror matbuot kotibi Hayot Shamsuddinov ma’lum qildi.

Qayd etilishicha, prokuratura protestida JIB Yangiyo‘l tuman sudining Rustamjon Mirzaxatamovga nisbatan hukmini bekor qilib, Jinoyat kodeksining 266-modda 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) doirasida jazo qo‘llash so‘ralmoqda. Bu moddada muayyan huquqdan mahrum qilgan holda 10 yilgacha ozodlikdan mahrum etish jazosi nazarda tutilgan.

Kun.uz avvalroq jinoyat ishlari bo‘yicha Yangiyo‘l tuman sudida YTH sodir qilib 2 bolaning o‘limiga sababchi bo‘lgan haydovchi sud zalida qamoqdan ozod etilganini tanqid qilgandi. Oradan bir hafta o‘tib esa YTHda bir kishining o‘limiga sababchi bo‘lgan haydovchiga ayni shu sudya hukmi bilan 2 yil ozodlikdan mahrum qilish jazosi tayinlangan. Har ikki ishga bir sudya – Ulug‘bek Ibragimov raislik qilgan.