Sirdaryoda pora bilan ushlangan sudya va bankda ishlagan mansabdorga hukm oʻqildi. Kun.uz sud hujjati bilan tanishdi.
Ish tafsiloti
Sud hukmiga koʻra, 39 yoshli E.S. Sirdaryo viloyati sudi iqtisodiy ishlar boʻyicha sudyasi, 40 yoshli D.T. esa “Agrobank”ning Guliston filiali boshqaruvchisi oʻrinbosari lavozimida ishlagan. Ikki sudlanuvchi avvaldan oʻzaro tanish boʻlgan.
Hududdagi MChJlardan birining rahbari Guliston tumanlararo iqtisodiy sudining avtostansiya binosini buzish haqidagi hal qiluv qaroridan norozi boʻlib, Sirdaryo viloyat sudi iqtisodiy ishlar boʻyicha sudlov hayʼatiga kassatsiya shikoyati kiritgan. D.T. ushbu MCHJ rahbari bilan tanish boʻlgan.
Shu tariqa, sudya va bank mansabdori til biriktirgan: D.T. MCHJ rahbarini pul bermagani uchun sud muhokamasi keyinga qoldirilayotganiga ishontirgan. U 8 ming dollar evaziga ishni ijobiy hal qilib berishni aytgan. Oʻz navbatida sudya sud muhokamasini noqonuniy ravishda 5-marta qoldirgan. Shundan soʻng D.T. 2026-yil 6-aprel kuni MCHJ rahbaridan 2 ming dollar olgan.
Sudya oʻz harakatini davom ettirib, pul mablagʻlari toʻliq boʻlmagani sababli 2026-yil 9-aprel kuni yetarli asoslarsiz sud muhokamasiga tanaffus eʼlon qilgan. 2026-yil 13-aprelda D.T MCHJ rahbaridan yana 5,5 ming dollar olgan. E.S. shu zahoti Guliston tumanlararo iqtisodiy sudining noqonuniy qurilishni buzdirish haqidagi hal qiluv qarorini bekor qilib, ishni MCHJ rahbari foydasiga ijobiy hal qilib bergan. Qoʻlga kiritilgan 7, 5 ming dollar pulni esa oʻzaro taqsimlab olishgan.
MCHJ rahbarining arizasi asosida oʻtkazilgan tezkor tadbirda pul mablagʻlarining 3 600 dollar E.S.dan, 3 900 dollari D.T.dan ashyoviy dalil tariqasida hujjatlashtirib olingan.
“Minnatdorchilik tariqasida oldim”
Sudya sud majlisida oʻz aybiga qisman iqrorlik bildirgan hamda pulni pora tariqasida emas, moddiy ragʻbatlantirish deb olganini aytgan.
“D.T. menga MCHJ rahbari tanishi ekanini, birinchi instansiya sudining qarori noqonuniy boʻlganini, tanishi rahbarligidagi jamiyat tomonidan bino oʻzboshimchalik bilan qurilmaganini aytdi va shu masalada qonuniy yordam soʻradi. Shundan soʻng, kassatsiya shikoyatini ish yurituvimga qabul qilib, sud muhokamasiga tayinladim.
2026-yil 13-aprel kuni Guliston tumanlararo iqtisodiy sudining hal qiluv qarorini bekor qilib, daʼvogar daʼvosini rad qilish toʻgʻrisida yangi qaror eʼlon qildim. Lekin birinchi instansiya sudining qarorini bekor qilishga kassatsiya shikoyatida koʻrsatilgan vajlar asos boʻlmadi.
