201 ta suyultirilgan gaz ballonini talon-toroj qilish holati aniqlandi

Qashqadaryo viloyatining Dehqonobod tumanida suyultirilgan gaz ta’minotidagi qonunbuzilish holati aniqlandi.

Foto: Hududgazta’minot

“Hududgazta’minot” xabariga ko‘ra, 12 dekabr kuni tuman suyultirilgan gaz xizmati ta’minotchi-chilangari N.B. hamda maxsus avtotransport vositasi haydovchisi A.N. “Tog‘aytemir” MFY iste’molchilariga yetkazib berilishi lozim bo‘lgan 100 dona maishiy gaz ballonlarni mazkur mahallada istiqomat qiluvchi fuqaro B.X.ning xonadonida tashkil etilgan “bunker”ga tushirayotgani aniqlangan.

Xonadon ko‘zdan kechirilganda olib kelingan ballonlardan tashqari yana 101 ta bo‘sh maishiy gaz ballonlar borligi ma’lum bo‘ldi.

Holat yuzasidan dalolatnoma tuzilib, barcha hujjatlar huquqni muhofaza qiluvchi organlar va FVBga taqdim etildi.