Ozarboyjon prezidenti Ilhom Aliyev dunyoda faqat ikkita qudratli davlat – Xitoy va AQSH borligini aytdi.
“Ular dunyodagi eng qudratli ikki davlatdir, uchinchisi yoʻq”, - dedi u “Yangi Ozarboyjon” partiyasining VIII syezdida qilgan chiqishida.
Aliyevning taʼkidlashicha, Boku bir vaqtning oʻzida Vashington va Pekin bilan strategik hamkorlik oʻrnatgan: Xitoy bilan strategik hamkorlik toʻgʻrisidagi deklaratsiya, AQSH bilan esa strategik xartiya imzolangan.
“Bu nima degani? Bizga boʻlgan ishonch, bizga boʻlgan munosabat, soʻzimizga boʻlgan ishonch. Dunyoda bizning soʻzimiz imzomizdek qadrli ekanini bilmaydigan odam qolmagan. Nima desak, oʻsha gapimizda turamiz. Hech qachon ikki yoqlama oʻyin oʻynamaganmiz. Hech qachon biror davlatga nisbatan ikkiyuzlamachilik, riyokorlik qilmaganmiz. Holbuki, biz bunday munosabatlarga koʻp marta duch kelganmiz, bugun ham duch kelyapmiz. Ammo biz hech qachon ulardek boʻlmaymiz. Biz oʻzimizni hurmat qiladigan insonlarmiz, biz qadr-qimmat bilan yashaymiz, siyosatimizni ham qadr-qimmat bilan yuritamiz”, dedi Ozarboyjon prezidenti.
