Janubiy Koreyada - Jeju Air samolyotining halokati tufayli tintuvlar

Janubiy Koreya politsiyasi 2 yanvar, payshanba kuni ertalab Jeju Air aviakompaniyasining Boeing 737-800 samolyoti 29 dekabr kuni qo‘nish chog‘ida halokatga uchragan Janubiy Koreyaning Muan xalqaro aeroportida tintuv o‘tkazdi. Shuningdek, tintuvlar aviakompaniyaning Seuldagi ofisi va Pusan ​​mintaqaviy aviatsiya ma’muriyatining Muan bo‘limida ham o‘tkazildi, deb xabar bermoqda "Ryonxap" axborot agentligi.

Rasmiylarning jurnalistlarga ma’lum qilishicha, tintuv o‘tkazish uchun order odamlar o‘limiga olib kelgan kasbiy ehtiyotsizlik ayblovi bo‘yicha berilgan.

Jeju Air samolyoti halokatidan so‘ng Janubiy Koreya hukumati mamlakat aviatashuvchilari tomonidan foydalaniladigan barcha Boeing 737-800 samolyotlari 29 dekabr kuni to‘g‘ri ishlamay qolgan shassi moslamasi yuzasidan maxsus tekshiruvdan o‘tkazilishini e’lon qildi. Prezident vazifasini bajaruvchi Choy Sang Mokning aytishicha, agar tekshiruvda samolyot modelida texnik nosozliklar aniqlansa, «zudlik bilan chora ko‘riladi». Janubiy Koreyaning oltita aviakompaniyasi 101 ta Boeing 737-800 samolyotlaridan foydalanadi.

Halokatda faqat ikki kishi omon qolgan

29 dekabr kuni Bangkokdan parvoz qilgan Jeju Air aviakompaniyasining Boeing 737-800 samolyoti uchish-qo‘nish yo‘lagidan chiqib ketdi va Janubiy Koreyaning Muan okrugidagi aerodrom panjarasiga borib urildi. Ushbu halokat bortdagi 181 kishidan 179 nafarining hayotiga zomin bo‘ldi.

AFP mahalliy MBC telekompaniyasi taqdim etgan videoga tayanib yozishicha, hatto qo‘nish vaqtida samolyot dvigatellaridan tutun chiqqan, shundan so‘ng yong‘in kemani qamrab olgan. Boshqa materiallar yong‘in birinchi navbatda samolyotning orqa qismiga o‘tganini ko‘rsatmoqda.

Dastlabki versiyaga ko‘ra, halokatga samolyotning qo‘nish vaqtida qushlar bilan to‘qnashib ketishi sabab bo‘lgan. Shu sababli, boshqa narsalar qatori, samolyotning shassi moslamasi ishlamay qolgan — samolyot uchish-qo‘nish yo‘lagi bo‘ylab nazoratsiz ravishda «chiqib ketgan».