«Amerikaning oltin asri hozirning o‘zidayoq boshlanadi». Trampning inauguratsiyasi qanday o‘tdi?

20 yanvar kuni Donald Tramp AQShning 47-prezidenti lavozimini rasman egalladi. U bilan birga vitse-prezident Jyey Di Vens ham qasamyod qildi.

Tramp AQSh Oliy sudi raisi Jon Robers qarshisida qasamyod qildi. Bu vaqtda uning yonida rafiqasi Melaniya Injil tutib turdi.

Shundan keyin Tramp inauguratsiya nutqini so‘zladi va tez orada qator «tarixiy hujjatlar» imzolashini bildirdi.

Xususan, avvalgi hukumatni tanqid qildi, inflatsiyani yengishga, «so‘z erkinligi va qonunni qaytarish»ga, «tinchlikparvar va birlashtiruvchi meros» qoldirishga, faqat ikki: erkak va ayol jinsini mustahkamlashga va’da berdi.

Oq uy veb saytining yangilangan bosh sahifasida Trampning surati va «Amerika qaytmoqda» yozuvi, shuningdek, bayonot paydo bo‘ldi: «Men har kuni tanamdagi har bir nafas bilan siz uchun kurashaman. Toki farzandlarimiz va siz munosib bo‘lgan kuchli, xavfsiz va farovon Amerika qurmagunimizcha tinchlanmayman. Bu haqiqatan ham Amerikaning oltin asri bo‘ladi».