Janubiy Koreyada JeJu Air samolyoti halokatining ehtimoliy asosiy sababi aytildi

Janubiy Koreyaning Aviatsiya va temir yo‘ldagi avariyalarni tekshirish qo‘mitasi Boeing 737-800 samolyoti halokati qurbonlarining yaqinlari uchun brifing o‘tkazdi. Mutaxassislarning aytishicha, samolyotning «qora qutisi» yozuvlari aeroport dispetcherlari «qushlar faolligi» haqida ogohlantirish berganidan roppa-rosa bir daqiqa o‘tib to‘xtagan. Videokuzatuv kameralari tasvirida samolyot qushlar galasi bilan «to‘qnashganidan» keyin ikkinchi davraga yo‘l olgani ko‘rinadi, deb xabar berdi Yonhap.

Taxminlarga ko‘ra, ikkala dvigatel ishdan chiqqanidan keyin samolyotning elektr ta’minoti uzilgan. Aeroport kameralaridan olingan videoda samolyot havoda bo‘lganida dvigatellaridan olov yoki tutun chiqqani qayd etilmagan, biroq komissiyaning tushuntirishicha, samolyot bir nechta qushlar bilan to‘qnashgan deb taxmin qilinmoqda. Mutaxassislar qulagan samolyotning ikkala dvigatelida ham qush patlari va qon dog‘lari topilganini tasdiqladi.

29 dekabr kuni JeJu Air aviakompaniyasiga tegishli samolyot Muanga qo‘nayotganda halokatga uchradi. Samolyot qo‘nish yo‘lagida tezligini pasaytira olmay, beton konstruksiyaga borib urilgan va yonib ketgan. Samolyot bortida 181 kishi bo‘lgan. Ulardan 179 kishi halok bo‘ldi, samolyotning dum qismida bo‘lgan ikki styuardessa tirik qoldi. Aviahalokat Janubiy Koreya tarixidagi eng halokatli voqea bo‘ldi va mamlakatda yetti kunlik motam e’lon qilindi.

Mutaxassislar halokatga texnik nosozlik sabab bo‘lishi mumkinligini taxmin qilishdi. JeJu Air samolyotining ikkita registratori parvozning so‘nggi daqiqalarini yozib olmagan, bu esa tergovni murakkablashtirgan.