Quyosh panellari va suv isitkichlari o‘rnatilishini prokuratura nazorat qiladi

O‘zbekistonda 2025 yilda aholi, kichik biznes va ijtimoiy soha obektlari tomonidan iste’mol qilinadigan elektr energiyasining kamida 40 foizi qayta tiklanuvchi energiya manbalari hisobiga qoplanishi rejalashtirilgan. Bu haqda bosh prokuror o‘rinbosari Shohrux Aminov «O‘zbekiston 24» telekanaliga bergan intervyusida ma’lum qildi.

Uning so‘zlariga ko‘ra, buning uchun mazkur inshootlarga quyosh batareyalari va suv isitkichlari o‘rnatiladi. Bu ishlab chiqarish tannarxini pasaytirishi kutilmoqda.

Bosh prokuror o‘rinbosari bu vazifa «so‘zsiz» bajarilishini ta’kidladi. O‘tgan yili Bosh prokuratura va viloyat organlari «bunday buyruqlarni bajarish bo‘yicha tajribaga ega bo‘ldi», dedi u.

Dekabrda Toshkent shahrida elektr energiyasidan noratsional foydalanishga qarshi reydlar o‘tkazilgan edi. Prokurorlar tadbirkorlarga nisbatan ma’muriy bayonnomalar tuzib, ularni jarima va elektr tarmog‘idan uzish ehtimolidan ogohlantirgan.

Bu tajribadan kelib chiqib, Prezident topshiriqlari ijrosi ustidan qattiq prokuror nazorati o‘rnatiladi, dedi Shohrux Aminov.

«Prezident „Hududgazta’minot“ kompaniyasi tomonidan aholini suyultirilgan gaz bilan ta’minlashda yo‘l qo‘yilayotgan qonunbuzarliklarni tanqid qildi. Bosh prokuraturaga mazkur sohani korrupsiyadan xoli hududga aylantirish bo‘yicha takliflar kiritish topshirildi», — dedi u.

Prokuratura, «Xududgazta’minot» va «O‘zenergoinspeksiya» o‘z takliflarini ishlab chiqadi va kiritadi.