Toshkent shahri va Surxondaryo viloyatida energiya resurslaridan noqonuniy foydalanish holatlari fosh etildi

Toshkent shahri Sergeli tumanida va Surxondaryo viloyati Qumqo‘rg‘on tumanida energiya resurslaridan noqonuniy foydalangan shaxslar aniqlangan. Bu haqda Bosh prokuratura huzuridagi departament xabar bermoqda.

Ma’lum qilinishicha, departamentning Sergeli tumani bo‘limi tomonidan o‘tkazilgan tergovga qadar tekshiruvda tadbirkor B.T. va boshqalar “A.S.” MChJga ijaraga bergan binosini tijorat maqsadida umumiy foydalanishdagi tarmoqqa yashirincha ulab, jami 289 mln so‘mlik elektr energiyasidan noqonuniy foydalanib kelgani aniqlangan.

Shu kabi, Departamentning Qumqo‘rg‘on tumani bo‘limi tomonidan o‘tkazilgan tergovga qadar tekshiruvda tumandagi “J.F.” fermer xo‘jaligi rahbari F.A. umumiy foydalanishdagi elektr tarmog‘iga suv nasoslarini to‘g‘ridan-to‘g‘ri ulab, jami 186,1 mln so‘mlik elektr energiyasidan noqonuniy foydalangani aniqlangan.

Qayd etilishicha, mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.