Damas va Labo ishlab chiqarishni to‘xtatish ko‘rib chiqilmayapti - “O‘zavtosanoat”

UzAuto Motors Damas va Labo avtomobillarini ishlab chiqarishni to‘xtatishni rejalashtirmayapti. Bu haqda «O‘zavtosanoat» matbuot xizmati Kun.uz’ga ma’lum qildi.

«Damas va Labo modellarini ishlab chiqarishni to‘xtatish ayni paytda ko‘rib chiqilmayapti. Mahsulotlar qatorida o‘zgarishlar bo‘lsa, rasmiy sahifalarimizda oldindan xabar beramiz», - deyiladi kompaniya izohida.

Ma’lumot uchun, O‘zbekistonda Damas ishlab chiqarish 1996 yilning mart oyidan boshlangan. 2006 yildan avtomobilning yangilangan versiyasi taqdim etildi. 2014 yildan esa ishlab chiqarish Andijondan Xorazm viloyatiga ko‘chirildi. Mamlakatda 2023 yilda 89,1 ming dona, 2024 yilda esa 101,9 ming dona Damas ishlab chiqarilgan.

Avvalroq, prezident Shavkat Mirziyoyev Tuproqqal’adagi Damas va Labo zavodida 100 mln dollar hisobiga bozorda katta talabga ega arzon avtomobil ishlab chiqarish boshlanishini aytgandi. Avtomobil Yevro-5 ekologik standartiga javob berishi va 7 o‘rindiqqa ega bo‘lishi qo‘shimcha qilingandi.

Shundan so‘ng ijtimoiy tarmoqlarda O‘zbekistonda Srumko‘duye N400 yoki Wuling avtomobillarini ishlab chiqarish boshlanishi mumkinligi haqidagi xabarlar tarqaldi. «O‘zavtosanoat» matbuot xizmati mazkur mish-mishlarga ham aniqlik kiritdi.

«Yangi model iste’molchilarning istak va ehtiyojlarini inobatga olgan holda tanlanadi. Ayni paytda texnik xususiyatlarning mahalliy foydalanish sharoitlariga mosligi, ishonchliligi va qulayligi bo‘yicha potensial avtomobil modellari o‘rganilyapti», deyiladi kompaniya izohida.