UzAuto Motors o‘zining eng xaridorgir mahsuloti – Cobalt avtomobili ishlab chiqarishni ko‘paytirdi, lekin bu modelning ichki bozordagi sotuvlarida sezilarli qisqarish kuzatilmoqda.
Statistika qo‘mitasi ma’lumotiga ko‘ra, 2026-yilning birinchi yarim yilligida 82 951 ta Cobalt ishlab chiqarilgan. Bu – o‘tgan yilning mos davridagi ko‘rsatkichdan 9,8 mingtaga yoki 13,5 foizga ko‘p:
Shu bilan birga, “O‘zavtosanoat” taqdim etgan sotuvlar statistikasiga qaraganda, joriy yil birinchi yarmida UzAuto Motors ichki bozorda 40 936 ta Cobalt sotgan. Bu – yuqorida keltirilgan ishlab chiqarish hajmining bor-yo‘g‘i 49 foizini tashkil etadi. Qolgan hajm eksportga yo‘naltirilgan va/yoki omborlarda o‘z xaridorini kutayotgan bo‘lishi mumkin.
Sotuvlar hajmini o‘tgan yilning birinchi yarmi bilan taqqoslaganda, joriy yilda Cobalt'ning ichki bozordagi sotuvi 39 foizga qisqarganini (67 580 tadan 40 936 taga, minus 26 644 dona) ko‘rish mumkin.
Rasmiy statistikaga ko‘ra, O‘zbekiston yanvar-iyun oylarida 130,4 ml dollarlik avtomobillar eksportini amalga oshirgan, bu ko‘rsatkich bir yil oldingidan 5 foizga kam. Statistika qo‘mitasi ham, “O‘zavtosanoat” va UzAuto Motors ham avtomobillar eksportining fizik hajmi va modellari kesimida ma’lumot e’lon qilmaydi.
Qozog‘istonda Chevrolet sotuvlari 32 foizga oshdi
Shu bilan birga, UzAuto Motors'ning asosiy eksport bozori bo‘lmish Qozog‘istonda joriy yil Chevrolet sotuvlari keskin oshgan. Qozog‘iston avtomobil uyushmasi ma’lumotlariga ko‘ra, 2026-yil birinchi yarim yilligida birlamchi avtomobil bozorida Chevrolet sotuvlari 32 foizga oshib, 17 586 taga yetgan. Shundan 16 370 tasi Cobalt hissasiga to‘g‘ri keladi.
Bu ko‘rsatkich bilan Chevrolet Qozog‘istonda eng ko‘p sotilayotgan avtomobillar reytingida yetakchilik qilmoqda. Ikkinchi o‘rindagi Hyundai sotuvlari joriy yilda 28,6 foizga qisqarib, 17 247 taga tushib qolgan (shundan 8601 tasi – Hyundai Tucson). Uchinchi o‘rinni 12 332 ta sotuv (+8,9 foiz) bilan Kia egallab turibdi (eng ko‘p Kia Sportage sotilgan – 5200 ta).
