Efiopiya yo‘lovchi samolyotlarini Rossiyaga ijaraga berishdan bosh tortdi

Rossiya Efiopiya bilan samolyotlarni ijaraga berish, jumladan texnik xizmat ko‘rsatish va ekipajlarni ta’minlash bo‘yicha muzokaralar olib borishga harakat qildi. Ethiopian Airlines rahbari AQSh sanksiyalarini bahona qilib, kelishuvni rad etdi.

Foto: Seyoum Getu/DW

Ethiopian Airlines Efiopiya aviakompaniyasi yo‘lovchi samolyotlarini Rossiyaga ijaraga berishdan bosh tortdi. Efiopiya fuqaro aviatsiyasi boshqarmasi (ECAA) Rossiya delegatsiyasi bilan muzokaralar olib borilganligini tan oldi, biroq u Ethiopian Airlines'ga samolyotlarni lizingga berish bo‘yicha buyruq jo‘natish vakolatiga ega emasligini va buni amalga oshirmaganligini ma’lum qildi, deb yozdi Addis Insight Efiopiya axborot portali.

O‘z navbatida, Ethiopian Airlines Group bosh direktori Mesfin Tasev Rossiya Federatsiyasi bilan samolyotlarni ijaraga berish masalasi bo‘yicha muzokaralar olib borilgani haqidagi xabarlarni qat’iy rad etib, ularni «butunlay yolg‘on» deb atadi. Jurnalistlar bilan suhbatda u Rossiya delegatsiyasi bilan uchrashuvda rasmiy kelishuvga erishilmaganini ta’kidladi, deb yozadi nashr.

Shu bilan birga, u ruslarga samolyotlarni ijaraga berishdan bosh tortishning ikkita asosiy sababini aytdi. Birinchidan, Ethiopian Airlines hozirda o‘z faoliyatini faol ravishda kengaytirmoqda va o‘zi yo‘lovchi va yuk havo tashishlariga ortib borayotgan talabni qondirish uchun qo‘shimcha samolyotlar izlamoqda, dedi Tasev.

Bundan tashqari, u Ukrainaga qarshi urushi va AQSh talablariga rioya qilmaslik xavfi tufayli Rossiyaga qarshi xalqaro sanksiyalarga ishora qildi. «Rossiya AQSh sanksiyalari ostida, Ethiopian Airlines esa AQSh bilan kuchli operatsion va tijorat aloqalariga ega», — dedi Tasev. Uning ta’kidlashicha, aviakompaniya «xalqaro qoidalar va AQSh qonunchiligiga muvofiq ishlaydi va ularni buzish xavfiga tayyor emas». Aviakompaniya bosh direktorining so‘zlariga ko‘ra, bu Rossiya bilan kelishuvga erishish mumkin emasligining yanada muhim sababidir.