Sakkizta davlat YeIning Belarusga qarshi sanksiyalar paketiga qo‘shildi

18 iyul kuni YeI Kengashi Rossiyaga qarshi 18-sanksiyalar paketi doirasida Belarusga nisbatan cheklov choralarini kiritgandi.

Yevroittifoqqa kirmaydigan sakkiz mamlakat YeIning Belarusga nisbatan joriy etgan 18-sanksiyalar paketiga qo‘shildi, deb ma’lum qildi YeI Kengashi.

Xabar qilinishicha, Albaniya, Bosniya va Gersegovina, Islandiya, Lixtenshteyn, Chernogoriya, Shimoliy Makedoniya, Norvegiya va Ukraina YeIning sanksiyalar kiritish qaroriga qo‘shilgan.

"Ular o‘z milliy siyosatlari Kengash qaroriga muvofiqlashtirilishini ta’minlaydi. Yevroittifoq bu majburiyatni e’tiborga oladi va olqishlaydi", - deyiladi YeI Kengashi bayonotida.

18 iyul kuni YeI Kengashi Rossiyaga qarshi 18-sanksiyalar paketi doirasida Belarusga nisbatan cheklov choralarini joriy etgandi.

Sanksiyalar Belarusning "Rossiya qurolli kuchlarini qo‘llab-quvvatlayotgan” sakkizta kompaniyasiga nisbatan kiritilgan. Shuningdek, Belarusdan qurol import qilishga embargo qo‘yilgan hamda mamlakatning to‘rtta banki bilan moliyaviy o‘tkazmalar olib borishga taqiq qo‘yilgan.

#YeI #sanksiya #Belarus