«Yuqori qo‘shilgan qiymatga ega bo‘lgan etilen va propilen polimerlaridan mahsulot ishlab chiqaruvchi mahalliy korxonalarni qo‘llab-quvvatlash bo‘yicha qo‘shimcha chora-tadbirlar to‘g‘risida» prezident qarori qabul qilindi. Unga ko‘ra:
- 2025 yilning 1 sentabridan 2028 yilning 1 yanvariga qadar O‘zbekistonda ishlab chiqarilmaydigan va aniq texnik parametrlar asosida shakllantirilgan ro‘yxat bo‘yicha olib kiriladigan polietilen granulalariga aksiz solig‘ining nol stavkasi;
- 2028 yilning 1 yanvarigacha ayrim etilen polimerlarining birlamchi shakllari va propilen polimerlarining birlamchi shakllari importi uchun bojxona bojining nol stavkasi qo‘llanadi.
Bojxona qo‘mitasiga Texnik jihatdan tartibga solish agentligi bilan birgalikda (eks-offitsio tamoyili asosida) mamlakatga sifatsiz kontrafakt qadoqlar, xususan, polietilen va polipropilen plyonkalar, noto‘qima materiallar, polietilen qoplar, big-beglar va boshqalar importining oldini olish choralarini ko‘rish topshirildi.
Shuningdek, polietilen granulalar ishlab chiqaruvchi mahalliy korxonalar uchun aksiz solig‘i solishda import bilan teng sharoitlar yaratiladi.
