Toshkent shahar hokimi Shavkat Umurzoqovning ta’kidlashicha, poytaxtning asosiy muammolaridan biri qurilish chiqindilaridir. Shaharda har kuni 5−6 ming tonnaga yaqin bunday chiqindilar hosil bo‘ladi.
“Toshkent shahrida qurilish chiqindilari uchun maxsus poligon yo‘q, mavjudi ham juda uzoqda. Shu tufayli qurilish chiqindilari u-bu joyga tashlab ketilmoqda”, — dedi u O‘zbekiston 24 telekanaliga bergan intervyusida.
Umurzoqovning so‘zlariga ko‘ra, prezident Toshkentda yoki poytaxt yaqinida qurilish chiqindilarini qayta ishlash zavodini qurishga ruxsat bergan.
Hozirda hokimlik Britaniya kompaniyasi bilan muzokaralar olib bormoqda. Loyiha qurilish chiqindilarini qayta ishlash va ulardan ikkilamchi taxta, inert va metall materiallar olish imkonini beradi. Hokim bu masalani hal qilish bilan juda katta imkoniyat yaratilishini ta’kidladi.
