"International Paper" kompaniyasi O‘zbekistonda Spunlace nomli noto‘qima material ishlab chiqarishni ilk bor yo‘lga qo‘ydi

2000 yildan buyon kompaniyamiz ELMA brendi ostida sanitariya-gigiyena mahsulotlarini ishlab chiqarib kelmoqda. Mamlakatimizda muhtaram prezidentimiz Shavkat Miromonovich Mirziyoyev rahbarligida amalga oshirilayotgan iqtisodiy islohotlardan ilhomlanib, biz o‘zimiz uchun yangi yo‘nalish – Spunlace noto‘qima material ishlab chiqarishni o‘zlashtirishga qaror qildik va shu yili Yevropa texnologiyalari asosida ishlab chiqarishni yo‘lga qo‘ydik.

Loyiha Fransiyaning ushbu sohadagi yetakchi kompaniyalaridan biri – ANDRITZ Perfojet SAS bilan hamkorlikda amalga oshirildi. Loyihani moliyalashtirish Uzbek Leasing International AO bilan hamkorlikda olib borildi. Loyihaning umumiy qiymati 10 million yevroni tashkil etdi.

Spunlace noto‘qima materiali nam xushbo‘y salfetkalar, gigiyenik salfetkalar, sochiqlar va shunga o‘xshash mahsulotlar ishlab chiqarishda qo‘llanadi. Yuqori sifatli yevropalik uskunalar va eng so‘nggi modifikatsiyalarga tayanadigan International Paper LLC kompaniyasi yuqori sifat va ko‘rsatkichlarga ega noto‘qima material ishlab chiqarmoqda. Ushbu material qo‘shimcha ravishda tagliklar, bir martalik pelenkalar, artish uchun mo‘ljallangan salfetkalar, tibbiy maqsadlarda ishlatiladigan buyumlarni ishlab chiqarishda ham foydalanilishi mumkin.

Yuqoridagilar mamlakatimiz aholisining ortib borayotgan ehtiyojlarini qondirish yo‘lida yangi turdagi mahsulotlar ishlab chiqarishga mahalliy tadbirkorlikka keng imkoniyatlar ochib beradi. Uskunaning yiliga 10 ming tonna mahsulot ishlab chiqarish quvvati O‘zbekiston tadbirkorlarining ushbu turdagi xomashyoga bo‘lgan talabini to‘liq ta’minlaydi. Bu esa kichik va o‘rta biznesning izchil rivojlanishiga, yangi ish o‘rinlari yaratilishiga va mamlakatimizda import o‘rnini bosish jarayonini jadallashtirishga xizmat qiladi. Shuningdek, mazkur mahsulot Markaziy Osiyo davlatlaridagi ishlab chiqaruvchilar ehtiyojini ham qondirish imkoniyatini yaratadi.