29-sentabr kuni Oʻzbekiston bank tizimining barqaror ishtirokchilaridan biri - Davr Bank xususiy aksiyadorlik tijorat banki tashkil etilganiga 25 yil toʻladi. Yubiley arafasida bank oʻz tarixida yangi sahifa ochadigan strategik bitim tuzdi: Oʻzbekiston va Ozarbayjon prezidentlari ishtirokida «ABB Davr» qoʻshma loyihasiga start berildi.
Davlat rahbarlari ishtirokidagi tarixiy qadam
2026-yil 22-avgust kuni Toshkentda IV Oʻzbekiston–Ozarbayjon hududlararo forumi doirasida Ozarbayjon Xalqaro banki (ABB) Boshqaruv raisi Abbos Ibragimov hamda Davr Bank taʼsischisi, Kuzatuv kengashi raisi Lutfulla Ubayev Davr Bank aksiyalarining nazorat paketini sotib olish toʻgʻrisidagi bitimni imzoladi.
Ertasi kuni, 23-avgustda Oʻzbekiston Respublikasi Prezidenti Shavkat Mirziyoyev va Ozarbayjon Respublikasi Prezidenti Ilhom Aliyev ishtirokida onlayn formatda yangi «ABB Davr» bank loyihasini ishga tushirishning rasmiy marosimi boʻlib oʻtdi. Ozarbayjon Prezidenti Ilhom Aliyev ushbu voqeani mamlakatning yetakchi banklaridan biri Oʻzbekiston bozoriga muvaffaqiyatli kirib kelgani sifatida baholadi.
«ABB Davr» brendi: innovatsiyalar va texnologik yuksalish
Erishilgan kelishuvlarga muvofiq, bank Oʻzbekiston bozorida «ABB Davr» brendi ostida faoliyatini davom ettiradi. Ozarbayjon moliya sektorining yetakchilaridan biri boʻlgan ABB Oʻzbekistonga sinovdan oʻtgan korporativ boshqaruv tizimi, raqamli yechimlar hamda sunʼiy intellektga asoslangan innovatsion loyihalarni olib kirishni rejalashtirmoqda. Kichik va orta biznesni rivojlantirish uchun qoʻshimcha imkoniyatlar yaratish asosiy ustuvor vazifa boʻladi.
«Ushbu bitim tufayli biz bank xizmatlarini sifat jihatidan yangi bosqichga olib chiqmoqdamiz. Yangi hamkorimizning tajribasi, innovatsion texnologiyalar va barqaror kapital Davr Bankgʼka qisqa muddatda mijozlarga eng ilgʻor moliyaviy mahsulotlarni taklif etish imkonini beradi. Bu hamkorlik bank uchun yanada yuqori barqarorlik va kuchli texnologik yuksalish kafolati boʻladi», - deya taʼkidladi Davr Bank taʼsischisi va Kuzatuv kengashi raisi Lutfulla Ubayev.
Oʻz navbatida, ABB boshqaruv raisi Abbos Ibragimov yangi strategik bosqichni aynan qardosh Oʻzbekistonda boshlash bank uchun katta sharaf ekanini qayd etib, loyiha mamlakat iqtisodiyoti va biznesi uchun ishonchli moliyaviy hamkorga aylanishiga ishonch bildirdi.
