Sud Trampning Los-Anjyelesga qo‘shin kiritganini noqonuniy deb topdi

Kaliforniya shimoliy okrugi federal sudi AQSh ma’muriyatining muhojirlarga qarshi reydlarga qarshi norozilik namoyishlari fonida Los-Anjyelesga AQSh Milliy gvardiyasi va dengiz piyoda askarlarini joylashtirish qarorini noqonuniy deb topdi. Bu haqda 2 sentabr, seshanba kuni CNN telekanali xabar berdi. Sudya Charlz Breyyer prezident Donald Tramp va mudofaa vaziri Pit Hegset 1878 yilda qabul qilingan, ayrim istisnolardan tashqari, politsiya va huquqni muhofaza qilish maqsadlarida ichki ishlarda harbiylardan foydalanishni taqiqlovchi qonunni buzgan deb qaror qildi.

Sud Kaliforniyada hibsga olish, tintuv qilish, patrul qilish va ko‘chalarni to‘sish uchun harbiylardan foydalanishni taqiqladi. Biroq Tramp ma’muriyatiga apellyatsiya shikoyati berish uchun vaqt berish maqsadida ushbu qarorning kuchga kirishi 12 sentabrga qoldirildi. OAV ma’lumotlariga ko‘ra, Vashington hozirdanoq sud hukmini prezidentning konstitutsiyaviy vakolatlarini cheklash deb hisoblab, ustidan shikoyat qilishga hozirlik ko‘rmoqda.

Da’vo Kaliforniya gubernatori, Demokratik partiya vakili Gevin Nyusom tomonidan berilgan. Uning ta’kidlashicha, harbiylar Los-Anjyelesda o‘z vakolatlaridan tashqarida bo‘lgan politsiya funksiyalarini bajargan. Sud bu dalillarga rozi bo‘ldi. Gubernatorlik ma’lumotlariga ko‘ra, shtat aholisi «Trampning shaharni noqonuniy harbiylashtirishiga javob qaytarishga» erishgan.