Krouford Alvaresni ham mag‘lub etdi va yana bir vaznda mutlaq jahon chempioniga aylandi

14 sentabrga o‘tar kechasi AQShning Nevada shtati, Las-Vegas shahridagi turnirda amerikalik Terens Krouford ikkinchi o‘rta vazn toifasida (-76,2 kg) mutlaq jahon chempionligi uchun meksikalik Saul «Kanelo» Alvares bilan ringga chiqdi.

Jang yakunida hakamlar qaroriga ko‘ra Terens g‘alabani qo‘lga kiritdi va super o‘rta vazn toifasida jahon chempioniga aylandi. 12 raunddan keyin hakamlar 115:113, 115:113, 116:112 hisobini qayd etishdi.

Krouford uchun bu vazn toifasidagi birinchi jang edi, u bu jang uchun qariyb 10 kg vazn qo‘shgandi, lekin bu unga jiddiy muammo tug‘dirmadi.

Endi tarixiy rekord o‘rnatdi – zamonaviy boks tarixida Terensdan oldin hech kim erkaklar o‘rtasida uchta divizionda mutlaq jahon chempioni bo‘la olmagan.

Bu – Krouford chempionlikka erishgan 5-vazn toifasi. U bundan avval yengil, birinchi yarim o‘rta, yarim o‘rta va birinchi o‘rta vazn divizionlarida chempion bo‘lgan. Yarim o‘rta va birinchi yarim o‘rta vazn toifasida esa Terens mutlaq chempionga aylangan.

37 yoshli Krouford hamon yengilmas bo‘lib qolmoqda, u faoliyatidagi 42 jangning barchasida g‘alaba qozongan. Uning oxirgi 20 jangi chempionlik jangi bo‘lmoqda. 

35 yoshli Alvares esa uchinchi bor mag‘lubiyatga uchradi. Uning hisobida 63 g‘alaba va ikki durang ham bor. Uning uchun bu jang o‘z divizionida beshinchi bor multaq jahon chempionlik tituli himoyasi edi.