Bir necha kun oldin oʻzbek boks afsonasi Rufat Risqiyev ogʻir xastalikdan soʻng 76 yoshida vafot etdi. Oʻz vaqtida jahon chempioni, olimpiada sovrindori boʻlgan sportchi chinakam oʻzbek boksining afsonasi edi.
Bugungi oʻzbek boksi dunyodagi eng yaxshilardan. Bu sport boʻyicha jahon chempionati va olimpiada oʻyinlarida Oʻzbekiston asosiy favoritlar qatorida boʻladi. Ayniqsa oxirgi oʻn yillikda oʻzbek boksi yangi darajaga koʻtarildi, koʻplab sportchilar bir necha martadan jahon chempioni va olimpiya oʻyinlari oltin medallarini qoʻlga kiritdi.
Sobiq Ittifoq davrida esa koʻplab oʻzbek sportchilari uchun jahon chempionati yoki olimpiadaga borish orzuligicha qolib ketar, chunki sovetlar bunday musobaqalarga oʻzbeklarni olib ketishi amri mahol edi. Ayniqsa bitta yoʻllanma uchun bir necha daʼvogarlar kurashgan yakkakurash turlarida. Afsonaviy Rufat Risqiyev oʻz isteʼdodi, matonati bilan SSSR davridagi bu stereotipni yoʻqqa chiqarib, oʻzbeklar orasida birinchi boʻlib jahon chempionligini qoʻlga kiritadi.
«Toshkent yoʻlbarsi»
Rufat Risqiyev 1949-yilda Toshkent viloyatining Oqqoʻrgʻon tumanida tugʻilgan. Bolaligida avvaliga oʻrtoqlari bilan akrobatika toʻgaragiga borgan, koʻp oʻtmay boks toʻgaragiga oʻtib ketadi.
«Toshkentning Navoiy koʻchasida turardik. Oʻrtoqlarimga qoʻshilib darsdan keyin akrobatika mashgʻulotlariga qatnaganman. Menga umuman yoqmagan boʻlsa-da, bir muddat shu sport turi bilan shugʻullanganman. Keyin oʻrtoqlarim boksga qatnashni boshladi, men ham ularga qoʻshildim. Koʻp oʻtmay oʻrtoqlarim negadir mashgʻulotga qatnamay qoʻyishdi. Mening hayotim esa boks bilan bogʻlandi», deb eslaydi oʻsha kunlarni afsonaviy sportchi.
Rufat ham Oʻzbekistonda boks ommalashishiga katta hissa qoʻshgan amerikalik murabbiy Sidney Jeksonning shogirdlaridan edi. Boʻlajak jahon chempioni katta bokschi boʻlib yetishishida Boris Granatkin, Aleksey Baranov, Boris Granatkin kabi murabbiylarning ham xizmati katta boʻlgan.
Rufat Risqiyev bir nechta xalqaro musobaqada zafar quchgach, 1968-yilda uni SSSR terma jamoasi safiga qabul qilishadi. 1972-yilda sportchi ittifoq birinchiligida barcha raqiblarini yengib, chempion boʻladi. 1974-yilgi SSSR chempionatida ham unga teng keladigan topilmagach, Moskvadagilar oʻzbek yigitga ishonch bildirib, jahon chempionatiga olib ketishadi.
