2025 yilning yanvar-iyul oylarida jami 6,3 mln nafar chet el fuqarolari turistik maqsadlarda O‘zbekistonga tashrif buyurdi, deya xabar berdi Milliy statistika qo‘mitasi.
Bu ko‘rsatkich o‘tgan yilning mos davri bilan solishtirilganda qariyb 2,1 mln nafarga yoki 48,9 foizga oshgan.
Joriy yilning dastlabki 7 oyida O‘zbekistonga tashrif buyurgan chet el fuqarolari mamlakatlar kesimida quyidagicha:
- Qirg‘iziston – 1,84 mln nafar (o‘tgan yilning mos davrida 1,2 mln nafar);
- Qozog‘iston – 1,46 mln nafar (845,8 ming nafar);
- Tojikiston – 1,44 mln nafar (1,2 mln nafar);
- Rossiya – 536,8 ming nafar (442,1 ming nafar);
- Afg‘oniston – 267,5 ming nafar (2883 nafar);
- Turkmaniston – 208,8 ming nafar (83,7 ming nafar);
- Xitoy – 103,1 ming nafar (35,5 ming nafar);
- Turkiya – 96,5 ming nafar (62 ming nafar);
- Hindiston – 38 ming nafar (33,3 ming nafar);
- Janubiy Koreya – 25 ming nafar (23,9 ming nafar);
- boshqa davlatlar – 289 ming nafar (231 ming nafar).
Hisobot davrida O‘zbekistonga kelayotgan xitoyliklar soni 2,9 barobarga, turkmanistonliklar soni 2,5 barobarga oshgan. MDH mamlakatlarini hisobga olmaganda, eng ko‘p sayyoh Afg‘onistondan kelyapti. Xususan, 7 oy ichida ushbu mamlakatdan O‘zbekistonga kelganlar soni qariyb 93 barobarga ko‘paygan. Bu Termizda logistika markazi ochilishi bilan bog‘liq bo‘lishi mumkin.
Umumiy tashrif buyuruvchilarning 5,2 mln nafari yoki 82,5 foizi qo‘shni davlat fuqarolari hissasiga to‘g‘ri kelgan.
«Statistik ma’lumotlar chuqurlashtirilishi kerak»
Iqtisodchi Otabek Bakirovning e’tibor qaratishicha, turistik xizmatlar eksporti 7 oyda 2 mlrd 542,3 mln dollarni tashkil etgan. Ya’ni har bir xorijiy turistga O‘zbekistonda o‘rtacha 403 dollarlik turistik xizmat sotilgan. O‘tgan yilning mos davrida esa turistik xizmatlar eksporti 1 mlrd 746,4 mln dollardan iborat bo‘lgan. Bitta xorijiy turistga 416 dollarlik xizmat ko‘rsatilgan.
