Tarkibida giyohvandlik vositalari bo‘lgan dorilar to‘xtatib qolindi

Namangan viloyati bojxona boshqarmasining “Uchqo‘rg‘on” chegara bojxona posti orqali qo‘shni mamlakatdan kelgan fuqaroga tegishli qo‘l sumkasi ko‘zdan kechirilganda bojxona deklaratsiyasida ko‘rsatilmagan 40 dona Tawan Liar dori vositalari borligi aniqlandi.

Ushbu post orqali harakatlangan yana bir kishining qo‘l yuklari orasidan ham deklaratsiyada ko‘rsatilmagan 40 dona shu kabi dorilar topilgan.

Boshqa bir holatda esa, “Uchqo‘rg‘on” chegara bojxona posti orqali O‘zbekistonga kirib kelgan fuqaroning mashinasi tekshirilganda xorijda ishlab chiqarilgan va og‘zaki so‘rovda ma’lum qilinmagan 40 dona Tawan Liar nomli dorilar borligi ma’lum bo‘ldi.

Ushbu dorilar ekspertizadan o‘tkazilganda ularning tarkibida “Tapentadol” va “Tramadol” moddalari borligi aniqlandi.

Ushbu moddalar Vazirlar Mahkamasining tegishli qaroriga asosan O‘zbekistonda muomalada bo‘lishi cheklangan giyohvandlik vositalari ro‘yxatiga kiradi.