Samarqandda piyodalar yo‘lakchasidan o‘tayotganlarni urib ketgan haydovchi 7 yilga qamaldi

Samarqand shahrida piyodalar yo‘lakchasidan o‘tayotgan fuqarolarni urib ketgan haydovchi jinoiy jazoga tortildi. Bu haqda Millar dasturi xabar berdi.

YTH 11 aprel kuni soat 20:00 larda Samarqand shahri Nurli yo‘l mahallasi hududidan o‘tuvchi Rudakiy ko‘chasida sodir bo‘lgandi. 1997 yilda tug‘ilgan haydovchi Lacetti mashinasini yuqori tezlikda boshqarib borib, yo‘lning belgilangan qismida piyodalarni o‘tkazish uchun to‘xtab turgan Labo ortidan urilgan. So‘ngra boshqaruvni yo‘qotib, piyodalar o‘tish joyidan o‘tayotgan 8 kishini urib yuborgan.

“O‘sha yerda 3 qator mashina yo‘l berdi. Biz o‘tayotgan vaqtda to‘rtinchi qatordan katta tezlikda kelib, to‘xtamasdan bizni urib yubordi. 2 yoshli qizim 20 metrga uchib ketdi. Oyog‘i sindi. Nogiron bo‘lib qolishi mumkin edi. Hozir yurganda oqsoqlanib yuradi. Jiyanim ham bor edi. Vafot etgan opam homilador edi”, degan jabrlanuvchilardan biri.

YTH oqibatida 33 yoshli ayol shifokorlar ko‘rsatgan yordamga qaramasdan hayotdan ko‘z yumgan.

“Shokka tushdim. Yetib kelgunimcha turmush o‘rtog‘im olamdan o‘tgan ekan. Farzandlarim onasining suratiga qarab qachon onamni olib kelasiz, deb so‘rashadi, eng qiyini shu savolga javob berish”, degan YTHda vafot etgan ayolning turmush o‘rtog‘i.

JIB Samarqand shahar sudi hukmi bilan haydovchi Jinoyat kodeksining 266-moddasi 2-qismida nazarda tutilgan jinoyatni sodir qilishda aybli deb topilgan. Unga 3 yil transport vositalarini boshqarish huquqidan mahrum qilgan holda 7 yil muddatga ozodlikdan mahrum qilish jazosi tayinlangan.

Qoidabuzarning onasi “baxtsiz hodisa” tufayli jabrlanganlardan uzr so‘rab, yolg‘iz boquvchisi bo‘lgan o‘g‘li yaqinda Rossiyadan qaytganini, “shunday ish qilaman deb ko‘chaga chiqmagani”ni aytib, intervyu bergandi.