Malayziya aviakompaniyasi Kuala-Lumpur - Toshkent yo‘nalishida muntazam qatnovlarni yo‘lga qo‘ydi

Haftasiga 3 marotaba amalga oshiriladigan mazkur aviaqatnovlar O‘zbekiston va Malayziya o‘rtasidagi savdo-iqtisodiy, turizm, ta’lim, madaniyat va sport sohalaridagi hamkorlik aloqalarini yanada rivojlantirishga hamda respublikaga Janubiy-Sharqiy Osiyo mamlakatlaridan kelayotgan sayyohlar oqimini oshirishga hissa qo‘shishi ta’kidlandi.

Air Asia X aviakompaniyasi bosh ijrochi direktori Binyamin Ismoil o‘z navbatida, yil davomida intiqlik bilan kutilgan ushbu reys 220 nafar yo‘lovchilarni, shu jumladan malayziyalik ziyoratchilarni Airbus A330 samolyotida Toshkent xalqaro aeroportiga olib borishini ta’kidladi.

"Ushbu birinchi reys bilan Buxoro, Samarqand, Xorazm viloyatlari va Toshkent shahrining turizm salohiyati bilan yaqindan tanishish maqsadida bir qator sayyohlik guruhlari O‘zbekistonga ketyapti. Mazkur aviaqatnovlar, shuningdek, ikki mamlakat o‘rtasidagi sayyohlar oqimi ko‘payishiga, ishbilarmon doira vakillarining hamkorlik aloqalarini rivojlantirishga hamda O‘zbekistonning Markaziy Osiyo va Janubiy-Sharqiy Osiyo mintaqalarini bog‘lovchi habga aylanishiga xizmat qiladi", – dedi Binyamin Ismoil.

Tadbir yakunida mazkur aviaqatnov yo‘lovchilari tantanali ravishda O‘zbekistonga kuzatib qo‘yildi.