«Dunyo» axborot agentligi xabariga koʻra, Haydarobod Centrum Airʼning Dehlidan keyin Hindistondagi ikkinchi yoʻnalishiga aylangan.
Agentlik yangi qatnovni Janubiy Hindiston va Markaziy Osiyo oʻrtasidagi ilk toʻgʻridan toʻgʻri havo yoʻnalishi sifatida qayd etgan.
Yangi reys imkoniyatlarini tanishtirish maqsadida Haydarobodda aviakompaniya va Oʻzbekistonning Hindistondagi elchixonasi hamkorligida taqdimot oʻtkazilgan.
Unda diplomatlar, aviakompaniya va aeroport vakillari, ishbilarmonlar, shuningdek, ishbilarmonlik tadbirlari, oilaviy va guruhli turizmga ixtisoslashgan yuzdan ortiq turoperator hamda sayyohlik kompaniyalari ishtirok etgan.
Turizm va biznes uchun yangi imkoniyat
Oʻzbekistonning Hindistondagi elchisi Sardor Rustamboyev yangi reyslar Telangana shtati va Hindistonning janubiy hududlari bilan hamkorlikni kengaytirishga xizmat qilishini taʼkidlagan.
Xususan, raqamli texnologiyalar, farmatsevtika, zargarlik va turizm sohalarida aloqalarni rivojlantirish imkoniyatlari qayd etilgan.
Taqdimotda Centrum Air vakili parvozlar jadvali va yoʻnalishda foydalaniladigan samolyotlar haqida maʼlumot bergan.
Toshkent orqali boshqa mamlakatlarga ham uchish mumkin
Yangi yoʻnalish Janubiy Hindiston aholisiga Oʻzbekistonga toʻgʻridan toʻgʻri kelish imkonini beradi.
Shuningdek, yoʻlovchilar uchun Toshkent aeroporti orqali Markaziy Osiyo, MDH, Yaqin Sharq va Yevropa mamlakatlariga tranzit sayohat imkoniyatlari taqdim etilishi bildirilgan.
Tadbirda Oʻzbekistonning turistik salohiyati, mehmonxonalari va dam olish maskanlari ham namoyish etilgan. Soʻnggi 5–6 yil ichida Hindistondan Oʻzbekistonga kelayotgan sayyohlar oqimi bir necha barobar oshgani taʼkidlangan.
Haydarobod aeroporti ham yangi qatnovga umid bogʻlamoqda
GMR Hyderabad International Airport Ltd - GHIAL vakillariga koʻra, yangi yoʻnalish biznes, savdo va madaniy almashinuvlarni faollashtirishi kutilmoqda.
