Android iPhone’dan xavfsizroq chiqdi - Google yangi tadqiqot natijalarini e’lon qildi

Google kompaniyasi va YouGov tadqiqot markazi o‘tkazgan so‘rov natijasiga ko‘ra, Android foydalanuvchilari iPhone egalari bilan solishtirganda ancha kam hollarda firibgarlik SMS va qo‘ng‘iroqlarga duch keladi. Bu haqda 9to5Google nashri xabar berdi.

Foto: Getty images

Tadqiqotda qayd etilishicha, so‘rovdan oldingi yetti kun davomida Android foydalanuvchilari iPhone egalariga nisbatan 58% kam firibgarlik xabarlarini olishgan. Eng yuqori darajadagi himoyani esa Google Pixel smartfonlari ko‘rsatgan — ularning egalari iPhone foydalanuvchilariga qaraganda 96% kam spam va fishing xabarlarini olishgan.

Bundan tashqari, iOS foydalanuvchilari haftasiga o‘rtacha 3 yoki undan ortiq shubhali SMS olganliklarini 65% hollarda bildirgan, bu esa Android foydalanuvchilariga nisbatan ancha yuqori ko‘rsatkich.

Google bu natijani RCS (Rich Communication Services) texnologiyasi, Android’ning ichki xavfsizlik tizimlari va sun’iy intellekt asosidagi himoya mexanizmlari bilan bog‘liq deb tushuntiradi. Kompaniya ta’kidlashicha, “Xabarlar” (Messages) va “Telefon” ilovalariga o‘rnatilgan SI-modellar firibgarlik va spam raqamlarini aniqlab, avtomatik tarzda bloklab qo‘yadi.

#Samsung #iOS #Android

Kun.uz yangiliklarini Google News'da kuzating

+ Obuna bo'lish