Oliy harbiy ta’lim bitiruvchilari 5 yil xizmat o‘tamasa, o‘qitish xarajati undiriladi

Prezident qarori bilan “O‘zbekiston fuqarolarining harbiy xizmatni o‘tash tartibi to‘g‘risida”gi nizomga o‘zgartish va qo‘shimcha kiritildi. Unga ko‘ra, oliy harbiy ta’lim muassasalarini bitirganlar ofitser lavozimlarida 5 kalendar yil xizmat o‘tamasa, ularni o‘qitishga sarflangan mablag‘lar davlat budjetiga undirib olinadi. Shuningdek, xodim sifatida boshqa idoralarga yo‘naltirilgan bitiruvchilar uchun ham 5 yil xizmat majburiyati qonunan mustahkamlanadi.

Foto: Sputnik / Ramiz Baxtiyarov

Amaldagi qoidalarga muvofiq, oliy harbiy ta’lim muassasasi bitiruvchilari o‘qishni yakunlagandan so‘ng ofitserlar tarkibi lavozimlarida 5 kalendar yil harbiy xizmatni o‘tashi shart edi, xizmat o‘talmasa, o‘qitish xarajatlarini qaytarish majburiyati bor.

Yangi qaror bilan shu norma aniqlashtirildi va kuchaytirildi: agar bitiruvchi ofitser lavozimida 5 yil xizmat qilmasa, o‘qitish uchun sarflangan mablag‘lar undiriladi.

Amaliyotda ba’zi bitiruvchilar harbiy xizmatchi sifatida emas, xodim tariqasida boshqa vazirlik-idoralarga yuborilayotgani inobatga olinib, ular uchun ham xodim sifatida 5 kalendar yil xizmatni o‘tash majburiyati qonunchilikda belgilab qo‘yildi. Majburiyat bajarilmasa, xarajatlar undiriladi.

Kuchga kirishi: qaror rasmiy e’lon qilingan sanadan amalga kiritiladi.