Rossiya Vetnamga mahalliy aviakompaniyalar samolyotlarini “hoʻl” lizing asosida Rossiya tashuvchilariga berish taklifini yubordi. Bu haqda Rossiya transport vaziri Andrey Nikitin 9-sentabr kuni Moskvada oʻtkazilgan Rossiya–Vetnam muzokaralaridan keyin maʼlum qildi.
“Hoʻl” lizingda samolyot nafaqat ijaraga beriladi, balki uning ekipaji, texnik xizmat koʻrsatilishi va boshqa operatsion xizmatlar ham ijara beruvchi tomon zimmasida qoladi.
Nikitinning aytishicha, Rossiya tomoni tegishli takliflarni Vetnamga taqdim etgan va hozir ular koʻrib chiqilmoqda.
Rossiya transport vaziri ikki mamlakat oʻrtasidagi sayyohlar oqimi sezilarli oʻsganini taʼkidladi. Uning maʼlumotiga koʻra, 2026-yilda Rossiya va Vetnamga oʻrtasidagi aviaqatnovlar koʻrsatkichi 2025-yilga nisbatan qariyb uch baravar oshgan.
Moskva Vetnam aviakompaniyalaridan samolyotlarni “hoʻl” lizingga olish ikki davlat oʻrtasidagi aviaqatnovlar sonini yanada koʻpaytirish imkonini beradi, deb hisoblamoqda.
Rossiya avval ham xorijiy samolyotlarni shu tartibda ijaraga olish boʻyicha boshqa davlatlar bilan muzokaralar oʻtkazgan. Ular orasida Markaziy Osiyo mamlakatlari, Qatar, Kuvayt va Efiopiya bor.
2025-yil yozida Efiopiya Rossiyaning taklifini rad etgan edi. Mamlakat rasmiylari Ethiopian Airlines samolyotlarini ijaraga berish boʻyicha qaror qabul qilish vakolatiga ega emasligini bildirgan. Shuningdek, AQShning ehtimoliy ikkilamchi sanksiyalari bilan bogʻliq xavflar ham qayd etilgan.
Hozirga qadar Rossiya aviakompaniyalarining xorijiy tashuvchilar bilan “hoʻl” lizing boʻyicha kelishuvga erishgani haqida xabar berilmagan.
Rossiya aviakompaniyalarining qoʻshimcha samolyotlarga ehtiyoji Boeing va Airbus laynerlarini xarid qilish hamda taʼmirlashdagi qiyinchiliklar fonida ortib bormoqda. Bu ikki ishlab chiqaruvchi samolyotlari Rossiya fuqarolik aviatsiya parkining qariyb uchdan ikki qismini tashkil etadi va yoʻlovchi tashishlarning 90 foiziga xizmat qiladi.
“Kommersant” hisob-kitobiga koʻra, yozda Rossiyaning 11 ta yirik aviakompaniyasidagi 673 ta samolyotdan 130 tasi parvozlarni amalga oshirmagan. Bu parkning qariyb beshdan bir qismiga teng.
2025-yil aprelida Rossiya prezidenti Vladimir Putin mahalliy aviakompaniyalarga xorijiy samolyotlarni “hoʻl” lizing asosida ijaraga olishga ruxsat bergan edi.
