Vetnam Sotsialistik Respublikasi Immigratsiya xizmati ma’lumotiga ko‘ra, endilikda mamlakatga kirishdan oldin barcha yo‘lovchilar maxsus elektron shaklni to‘ldirishi shart. Yangi tartib Uzbekistan Airways aviakompaniyasining 23 iyundagi HY561 reysidan boshlab amal qiladi.
Yo‘lovchilar Vetnamga uchishdan oldin rasmiy elektron portal orqali Pre-Arrival Information shaklini to‘ldirishi, arizani mamlakat chegarasini kesib o‘tishdan kamida 72 soat avval yuborishi lozim.
Ro‘yxatdan o‘tish yakunlanganidan keyin shakl bo‘yicha taqdim etilgan QR-kodni smartfonda saqlab qo‘yish yoki qog‘ozga chiqarib olish tavsiya etiladi. Mazkur QR-kod Vetnam chegara nazoratidan o‘tish vaqtida talab qilinishi mumkin.
Aviatashuvchi yo‘lovchilarni safar oldidan barcha hujjatlarni rasmiylashtirib, yangi talablarni oldindan bajarishga chaqirdi.
