YeI ukrainalik jurnalist Roshchinaning o‘limi uchun sanksiyalar joriy etadi

Yevropa Ittifoqi Rossiya Federal jazoni ijro etish xizmati (FSIN) xodimlariga nisbatan shaxsiy sanksiyalar joriy etishni rejalashtirmoqda — ular ukrainalik jurnalist Viktoriya Roshchinaga nisbatan qiynoqlar va uning o‘ldirilishiga aloqador deb hisoblanmoqda. «Sistema» nashrining 12 noyabr kungi xabariga ko‘ra, ro‘yxatga jurnalistlar va faollarni siyosiy ta’qib qilishga aralashgan kuch tuzilmalari xodimlari va sudyalar ham kiritiladi.

Nashr manbalariga tayanib xabar qilinishicha, sanksiyalar FSINning ukrain mahbuslari qiynoqqa solingani uchun javobgar deb ko‘rilgan Taganrogdagi SIZO-2 xodimlarini ham qamrab oladi. Yevropa Ittifoqi ma’lumotlariga ko‘ra, Roshchina 2024 yil sentabr oyida aynan shu yerda halok bo‘lgan.

12 noyabr kuni YeI mamlakatlari elchilari cheklov choralarini joriy etish qarorini ma’qulladi. Sanksiya ro‘yxatiga 10 nafar Rossiya fuqarosi kiritilgan, ulardan to‘rt nafari — YeI fikricha Viktoriya Roshchina o‘limi uchun mas’ul deb hisoblanadigan FSIN xodimlari.

Bundan avval Ukrainadagi «Slidstvo.info» nashri Roshchina Taganrogda emas, balki Perm o‘lkasining Kizel shahridagi SIZO-3 da vafot etgan bo‘lishi mumkinligini xabar qilgan edi. Jurnalistlar ma’lumotiga ko‘ra, 2024 yil sentabrda u Taganrogdagi SIZO-2dan Kizelga o‘tkazilgan va shu yerda 19 sentabr kuni 27 yoshida vafot etgan.

Sobiq ukrain harbiy asirlari bu muassasada mahbuslar hushidan ketguncha kaltaklanishi, ayollarning esa majburan yoppasiga sochi olib tashlanishini aytgan. Rossiya hokimiyati Viktoriya Roshchinani ushlab turish faktini faqat 2024 yil may oyida tasdiqlagan. Uning jasadi 2025 yil fevral oyida Ukraina tomoniga topshirilgan bo‘lib, unda qiynoq izlari aniqlangan, ayrim ichki a’zolari yetishmagani qayd etilgan.