Choy yetishtirishdan tortib «aqlli «dehqonchilik»kacha: O‘zbekiston va Xitoy yangi loyihalarni muhokama qildi

Qishloq xo‘jaligi vaziri maslahatchisi Nuriddin Qo‘shnazarov Xitoy Xalq Respublikasining Anxoy provinsiyasida joylashgan «Anxoy qishloq xo‘jaligi universiteti» direktori Sao Xaytsyun bilan uchrashuv o‘tkazdi.

Muloqot davomida ikki mamlakat o‘rtasida qishloq xo‘jaligi sohasidagi hamkorlikni yanada rivojlantirish, zamonaviy ilmiy va innovatsion loyihalarni amaliyotga tatbiq etish masalalari muhokama qilindi.

Suhbat avvalida Sao Xaytsyun Toshkent davlat agrar universiteti bilan yo‘lga qo‘yilgan hamkorlikni yuksak baholadi. U ikki oliygoh o‘rtasida olib borilayotgan qo‘shma ilmiy tadqiqotlar va talabalar almashinuvi dasturlari so‘nggi yillarda sezilarli natijalar berganini qayd etdi.

Shuningdek, u O‘zbekistonning agrar ta’lim sohasida erishayotgan yutuqlarini alohida e’tirof etdi va Toshkent davlat agrar universitetining 95 yillik yubileyi munosabati bilan samimiy tabriklarini izhor qildi.

Uchrashuvda tomonlar qishloq xo‘jaligi ta’limi, ilm-fan va ishlab chiqarish integratsiyasini mustahkamlash, «aqlli qishloq xo‘jaligi»ni rivojlantirish, choy yetishtirish va qayta ishlash, tuproq unumdorligini tiklash, suvni tejovchi texnologiyalarni joriy etish hamda biologik seleksiya yo‘nalishida hamkorlikni kengaytirish bo‘yicha fikr almashdilar.

Uchrashuv yakunida hamkorlikni yanada kengaytirish, professor-o‘qituvchilar va talabalarning o‘zaro almashinuvini kuchaytirish, shuningdek, Xitoyning ilg‘or agrar texnologiyalarini O‘zbekiston agrar ta’lim tizimiga tatbiq etish bo‘yicha kelishuvga erishildi.