«Mehmonimizni sharmanda qilish shartmas» – Tramp bin Salmonga noqulay savollar bergan jurnalistni tanqid qildi

18 noyabr kuni Saudiya Arabistoni valiahd shahzodasi Muhammad bin Salmon Oq uyda AQSh prezidenti Donald Tramp bilan uchrashuv o‘tkazdi. Jurnalistlar bilan uchrashuvda kutilganidek unga saudiyalik jurnalist Jamol Qoshiqchining o‘ldirilishi hamda «11 sentabr voqealari»da Saudiya fuqarolarining roli haqida savollar berildi.

Donald Tramp bu savollarga keskin javob qaytardi. «Mehmonimizni bunday savollar bilan sharmanda qilishingiz shart emas», dedi Tramp ABC News jurnalisti Meri Bryusga. U keyinroq uning savolini «dahshatli, itoatsiz va shunchaki qo‘rqinchli savol» deb atadi.

“ABC fake xabarlar [tarqatadi]. Eng yomon nashrlardan biri, lekin men savolga javob beraman.

Meni oilaviy biznesga hech qanday aloqam yo‘q. Men u yerdan ketganman va energiyamning 100 foizini ishga bag‘ishlaganman. Oilam hamma joyda biznes qiladi. Aslida ular Saudiya Arabistoni bilan juda oz ish qilgan, menimcha ular juda ko‘p ish qilishi ham mumkin".

Shuningdek, Tramp Qoshiqchini «juda bahsli odam» deb atadi.

«Siz gapirayotgan o‘sha kishini juda ko‘pchilik yoqtirmagan. Uni yoqtirgan bo‘lsangiz ham, yoqtirmagan bo‘lsangiz ham — voqealar sodir bo‘ladi, lekin u (valiahd shahzoda) bu voqeada hech narsani bilmagan va biz shu bilan yakunlaymiz», deya Trampning so‘zlarini keltirmoqda AP nashri. Lekin avvalroq AQSh razvedkasi bu hujum shahzodaning buyrug‘i bilan amalga oshirilganini aytgan.

Bin Salmonning aytishicha, Usama bin Laden AQSh-Saudiya munosabatlarini buzish uchun saudiyalik fuqarolardan foydalangan.

“2001 yil 9 sentabr voqealarida halok bo‘lganlarning oilalari biz uchun ham og‘riqli bo‘lgan. Lekin biz reallikka yuzlanishimiz kerak. MRB va boshqa tashkilotlar hujjatlarida kelganidek, Usama bin Laden saudiyalik fuqarolardan foydalangan. Maqsad AQSh-Saudiya munosabatlarini buzish uchun. Chunki u bilgan: bizning yaxshi munosabatlarimiz ekstrimizm va terrorizm uchun «xavf tug‘dirgan». Shuning uchun biz munosabatlarimizni rivojlantirib, bunga qarshi kurashda davom etishimiz kerak".

Qoshiqchining o‘ldirilishiga aloqadorligini rad etib kelgan shahzoda bin Salmon esa hukumati choralar ko‘rganini aytdi.

«Bu – biz uchun og‘riqli bo‘lgan. Biz Saudiya Arabistonida tekshiruvning barcha to‘g‘ri bosqichlarini bajardik. Tizimimizni, shunday hodisalar qaytarilmasligiga ishonch hosil qilish uchun yaxshiladik. Bu og‘riqli va ulkan xato edi», — dedi bin Salmon.

Tramp, shuningdek, qirollikning inson huquqlari borasidagi yutuqlarini maqtadi, ammo aniq bir tafsilot keltirmadi: «U inson huquqlari va boshqa barcha narsalar bo‘yicha sodir etgan ishlar — bu ajoyib», dedi Tramp.

Tramp, ABC News va muxbirlar

Tramp ABC News'ning Oq uy bo‘yicha muxbiri Bryusdan juda g‘azablangandek tuyuldi. U jurnalist yana Epshteynga oid hujjatlarni nima uchun bir tomonlama e’lon qilmagani haqida savol berganida uni yana haqorat qildi.

«Savolning o‘zi menga yoqmayapti, demayman; sizning ohangingiz yoqmaydi», dedi Tramp Bryusni jyerkib. «Menimcha, siz juda yomon jurnalissiz. Masala – bu savollarni qanday berishingizda. Siz yomon odamsiz va yomon jurnalissiz», dedi Tramp.

Tramp oxir-oqibat Bryusning savollarini davom ettirishga qiziqmasligini bildirdi. «Siz qaytib, jurnalist bo‘lishni o‘rganishingiz kerak. Sizdan boshqa savol yo‘q», degan Tramp.

New York Times'ning yozishicha, bu — Trampning bir hafta ichida unga tegishli mavzuni yoritayotgan ayol jurnalistni keskin haqorat qilishi bo‘yicha ikkinchi holat bo‘ldi.

Juma kuni Air Force One bortida u Bloomberg News jurnalisti Ketrin Lusi undan nima uchun hanuzgacha Epshteyn hujjatlarini e’lon qilmagani haqida so‘ramoqchi bo‘lganida uni to‘xtatib qo‘ygandi. «Jim! Jim, cho‘chqacha», degan Tramp jurnalistga.

Nashrga ko‘ra, Tramp matbuot xodimlarini haqorat qilishi odatiy hol. Biroq u Oq uy muxbirlaridan haftasiga o‘nlab savollarni qabul qiladi, ba’zida bir kunda bir necha bor jurnalistlar bilan uchrashadi.

Tramp so‘nggi oylar ichida ABC jurnalistlari unga yoqmagan savol bergani uchun uning efir litsenziyasini bekor qilish bilan bir necha bor tahdid qilgan. U o‘tgan yili ABC News'ni tuhmat bo‘yicha sudga bergan; tarmoq ushbu ishni hal qilish uchun 16 million dollar to‘lagan.

18 noyabrdagi uchrashuvda ham Tramp ABC’ni «ahmoqona kompaniya» deb atadi va tarmoqning efir litsenziyasi «tortib olinishi kerak»ligini qaytardi.