Mutaxassislar Toshkent aholisini havo ifloslanishi sharoitida ehtiyot choralarini ko‘rishga chaqirdi

2025 yil 21 noyabr kuni soat 09:00 holatiga ko‘ra atmosfera havosi ifloslanishi monitoringi avtomatik stansiyalari ma’lumotlariga binoan, Toshkent shahrida havo sifati ko‘rsatkichlarida xavotirli o‘zgarish qayd etildi.

Ma’lumotlarga ko‘ra, PM10 turidagi mayda dispersli zarrachalar miqdori 267,3 mkg/m³ ni tashkil etdi. Bu ko‘rsatkich ruxsat etilgan me’yor (REM — 300 mkg/m³)dan oshmagan.

Shu bilan birga, PM2,5 turidagi mayda dispersli zarrachalar miqdori 187,2 mkg/m³ ga yetgan. Bu esa belgilangan me’yor — 60 mkg/m³ dan 3,1 barobar yuqori ekanini ko‘rsatadi. Mutaxassislar aytishicha, bunday holat nafas yo‘llari va yurak-qon tomir tizimida muammolari bor shaxslar uchun ayniqsa xavfli hisoblanadi.

Ta’kidlanishicha, ko‘rsatkichlarning oshishiga havo haroratidagi keskin o‘zgarish ham ta’sir qilgan. Harorat o‘zgarishi inversiya jarayonini keltirib chiqaradi, natijada mayda zarrachalar havoning pastki qatlamlarida to‘planib, atmosferada ularning konsentratsiyasi oshadi.

Mutaxassislar respublika aholisi, ayniqsa poytaxtda yashovchi fuqarolar va mehmonlardan qo‘shimcha ehtiyot choralarini ko‘rishni so‘ramoqda. Jumladan:

• ochiq havodagi faoliyatni, ayniqsa yugurish, sport bilan shug‘ullanish kabi jismoniy yuklamalarni vaqtincha qisqartirish;
• imkoni boricha uy yoki ishxona binolarida qolish, zarurat tug‘ilgandagina tashqariga chiqish;
• ko‘chaga chiqqanda niqob taqish, bolalar, keksalar va surunkali kasalligi bor shaxslarni iloji boricha havodan himoya qilish tavsiya etilmoqda.

Shu bilan birga, aholiga rasmiy manbalar orqali e’lon qilinadigan havo sifatiga oid ma’lumotlarni muntazam kuzatib borish, sog‘liq bilan bog‘liq shubhali holatlarda shifokorlarga murojaat etish tavsiya etiladi.