Ternopilda Rossiya hujumidan keyin vayronalar ostida qolganlarni qidirish davom etmoqda

Ternopil shahrida Rossiya hujumi sodir bo‘lgan joyda ikkinchi kundirki qidiruv va avariya-qutqaruv ishlari davom etmoqda. «Qutqaruvchilar to‘xtovsiz ishlayapti, vayronalarni tozalayapti, beton konstruksiyalarini chiqarib tashlayapti va odamlarni qidirmoqda — vayronalar ostida qolib ketgan bo‘lishi mumkin bo‘lganlarni», deb xabar berdi Ukraina Favqulodda vaziyatlar bo‘yicha davlat xizmati payshanba, 20 noyabr kuni.

Xizmat ma’lumotlariga ko‘ra, hujum natijasida 26 kishi, jumladan uch nafar bola halok bo‘lgan, yana 93 kishi, shu jumladan 18 nafar bola yaralangan. 46 nafar jabrlangan shaxsni, shulardan yetti nafar bolani tirik holda qutqarib qolish imkoni bo‘lgan. Taxminan 20 nafar kishi hanuzgacha bedarak yo‘qolganlar sifatida qayd etilgan.

Chorshanba, 19 noyabrga o‘tar kechasi Rossiya qo‘shinlari Ternopilga raketalar va dronlardan foydalangan holda kuchli qo‘shma zarba berdi. Natijada to‘qqiz qavatli turar joy uyining bir qismi quladi. Ukraina Qurolli Kuchlari Havo kuchlari vakili Yuriy Ignatning aytishicha, dastlabki ma’lumotlarga ko‘ra, uyga X-101 rusumli raketa kelib urilgan. Yana bir to‘qqiz qavatli uy ham zararlangan.

Rossiya harbiylari Ternopilda tinch aholining halok bo‘lishi haqida izoh bermagan. Shu bilan birga, Rossiya Mudofaa vazirligi zarba harbiy-sanoat kompleksi va energetika obektlariga berilganini iddao qilmoqda.