Agrar sohani qo‘llab-quvvatlashning yangi tizimi joriy etiladi

Prezident Shavkat Mirziyoyev “Agrar sohani davlat tomonidan qo‘llab-quvvatlash tizimini tubdan takomillashtirish chora-tadbirlari to‘g‘risida”gi farmonni imzoladi. Hujjatga muvofiq, qishloq xo‘jaligini moliyaviy qo‘llab-quvvatlash tubdan isloh qilinib, yagona raqamlashtirilgan tizimga o‘tkaziladi.

Farmonga ko‘ra, agrar sohani moliyaviy qo‘llab-quvvatlash tizimini raqamlashtirish orqali mehnat va vaqt resurslari sarfi 2 baravarga qisqartirilishi ko‘zda tutilgan. Shuningdek, oziq-ovqat va qishloq xo‘jaligi sohalarida faoliyat yuritayotgan tadbirkorlarga davlat tomonidan ko‘rsatiladigan qo‘llab-quvvatlash choralari unifikatsiya qilinadi va ularning soni 2028 yil yakuniga qadar 50 foizgacha qisqartiriladi.

Farmon bilan Qishloq xo‘jaligi vazirligi huzurida Agrar sohada to‘lovlar agentligi tashkil etiladi.

Yangi Agentlik zimmasiga quyidagi vazifalar yuklatilmoqda:

— agrar sohada qo‘llab-quvvatlash choralarining yangi turlarini joriy etish bo‘yicha takliflar ishlab chiqish;
— qo‘llab-quvvatlash choralarini ko‘rsatish uchun arizalarni qabul qilishdan boshlab, ularni ko‘rib chiqish, ma’qullash va to‘lovlarni amalga oshirishgacha bo‘lgan barcha bosqichlarni to‘liq raqamlashtirish.

Farmonga muvofiq, 2026 yil 1 yanvardan:

— mazkur hujjatda belgilangan qo‘llab-quvvatlash choralari Agrar sohada to‘lovlar agentligi tomonidan amalga oshiriladi;
— qo‘llab-quvvatlash choralari tadbirkorlarga alohida maxsus hisob raqamlar (23210) ochish orqali moliyalashtiriladi.

Mazkur islohotlar agrar sohada davlat tomonidan qo‘llab-quvvatlash mexanizmlarini soddalashtirish, oshkoralikni ta’minlash va resurslardan samarali foydalanishga xizmat qilishi kutilmoqda.