APLda noodatiy qizil kartochka ko‘rsatildi

«Manchester Yunayted» – «Everton» 0:1
Gol: Dyusberi-Holl, 29 (0:1)
«Manchester Yunayted»: Lammens, de Ligt, Shou, Yoro, Brunu Fernandesh, Kazemiro (Dalot, 58), Dorgu (Maynu, 58), Mazraviy (Maunt, 46), Diallo, Mbemo, Zirkze
«Everton»: Pikford, Kin, Tarkovski, Mikolenko, Koulman (O`Brayyen, 10), Guyye, Garner, Dyusberi-Holl (Alkaras, 88), Grilish (Makneyl, 88), Ndiay (Iroegbunam, 82), Barri (Betu, 82)
Ogohlantirishlar: Mbemo, 45. Kazemiro, 50
Chetlatish: Guyye, 13

«Manchester Yunayted» APLning 12-tur o‘yinlaridan keyin kuchli to‘rtlikka kirib olishi mumkin edi. Buning uchun jamoa o‘z uyida «Everton»ni mag‘lub etishi talab etilardi. Bu raqibga qarshi «Old Trafford»dagi so‘nggi mag‘lubiyat 2013 yilda – Devid Moyyesning «MYu»dagi ilk mavsumida ro‘y bergandi. Endi esa shotlandiyalik murabbiy «Everton» bosh murabbiyi sifatida ushbu stadionga tashrif buyurgandi.

O‘yin starti voqealarga boy kechdi. O‘yinning 10-daqiqasidayoq «Everton» sardori Sheymus Koulman safdan chiqdi. Holbuki klub afsonasi APLning joriy mavsumida ilk bor boshlang‘ich tarkibdan o‘rin olgandi. Ammo 37 yoshli irlandiyalik himoyachi yana jarohat oldi va mehmonlar ustozi kutilmagan almashtirish amalga oshirishga majbur bo‘ldi.

Sardor yo‘qligida «Everton» futbolchilari orasida favqulodda hodisa yuz berdi. Jamoadoshlarning o‘zaro janjalidan keyin ulardan biri maydondan chetlatilishi kamyob hodisa hisoblanadi. Va «Old Trafford»da yig‘ilgan muxlislar aynan shunday hodisaga guvoh bo‘lishdi. O‘yinning 13-daqiqasida «MYu» hujumi vaqtida «Everton» yarimhimoyachisi Idrissa Guyye to‘pni egallab oldi va o‘z yaqinida turgan himoyachi Maykl Kinga uzatdi. Ammo himoyachi uni tushunmadi va to‘pni qabul qilmadi, natijada to‘pga ega chiqqan Brunu Fernandesh xavfli zarba yo‘lladi.

Kin senegallik jamoadoshini jarima maydoni ichida bunday tavakkalchilik qilgani uchun koyidi, Idrissa esa unga tashlanib qoldi va uning yuziga shapaloq tortib yubordi. Vaziyatni yaqindan kuzatib turgan bosh hakam Toni Harrington esa darhol cho‘ntagidan qizil kartochkani chiqardi.

Kin ham jamoadoshiga baqirib, uni maydonni tark etishga unday boshladi, Idrissa esa maydonni tark etishni istamasdan, yana Kinga hujum qilmoqchi bo‘ldi, faqat darvozabon Jordan Pikford va yarimhimoyachi Iliman Ndiayyening o‘rtaga tushishi vaziyat yanada yomonlashishining oldini oldi, shundan keyin futbolchi kiyim almashtirish xonasiga yo‘l oldi.

Tanaffusda Angliya Premer-ligasining ijtimoiy tarmoqlardagi sahifalarida mazkur epizod yuzasidan tushuntirish berildi. Xabarda Harringtonning qarori to‘g‘riligi VAR tomonidan tasdiqlangani qayd etilgan: «Everton» futbolchisining harakati Kinning yuziga urish deb talqin qilingan. Qoidalarga ko‘ra, bunday tajovuzkor harakat raqibga yoki jamoadoshga qarshi qilinishining farqi bo‘lmaydi – har ikki holatda ham qoidabuzar maydondan chetlatiladi.

Bunaqasi oldin ham bo‘lgan

Bu juda kam kuzatiladigan holat, ammo birinchisi emas. Katta yoshli muxlislar bu epizoddan keyin darhol 2005 yilda «Nyukasl» va «Aston Villa» o‘yinida ro‘y bergan hodisani yodga olishdi.

O‘shanda «Nyukasl» 0:3 hisobida ortda borayotganida Kiron Dayyer va Li Boyyer 50 ming muxlis ko‘z o‘ngida mushtlashib ketgan, ularni ajratish uchun «Aston Villa» futbolchisi Garet Berri ham yetib kelgan. Hakam esa ularning ikkisini ham maydondan chetlatgan, holbuki «qarg‘alar» bu vaqtga kelib shusiz ham bir kishi kam bo‘lib o‘ynayotgandi.

Bunga o‘shanda Li Boyyer hujumdagi sherigi Kiron Dayyer to‘pni unga uzatmaganidan (bungacha Boyyer ko‘plab vaziyatlardan foydalana olmagandi) jahl otiga mingandi. Kiron u to‘pni so‘raganda shunday javob qaytargan: «Men senga pas bermayman, chunki sen – bir uyum axlatsan!»

«Nyukasl»ning o‘sha vaqtdagi bosh murabbiyi Grem Sunnes o‘yindan keyin shunday deydi: «Klub bunday sharmandalikni hali ko‘rmagandi. Bunga yo‘l qo‘yib bo‘lmaydi!»

«Nyukasl» o‘shanda Dayyerning yonini oladi va qizil kartochka yuzasidan apellyatsiya ham beradi. Boyyer esa 6 haftalik maoshi (210,000 ming funt) miqdorida jarimaga tortilib, jamoa mashg‘ulotlaridan chetlatiladi.

«Everton» Guyye yuzasidan qanday qaror qabul qilishi hozircha noma’lum.

«MYu» son jihatdan ustunlikdan foydalana olmadi

Kutilmaganda son jihatdan ustunlikka ega bo‘lib olganidan keyin «MYu» to‘pga egalik qildi. Ammo Amorim shogirdlari o‘yin taqdiri allaqachon hal bo‘lgandek xotirjamlikka berilishdi. Mersisaydliklar esa ozchilik bo‘lib qolganidan keyin ham himoyaga chuqur yotib olmadi va vaqti-vaqti bilan hujumlar uyushtirdi.

Va shunday hujumlardan biri gol bilan yakunlandi. 29-daqiqada Kirnan Dyusberi-Holl to‘pni qabul qilib olib, raqib jarima maydoniga yaqinlashdi va Brunu Fernandesh hamda Leni Yoroni ortda qoldirib, aylanma zarba yo‘lladi. Va to‘p to‘g‘ri olis burchakka borib tushdi. «MYu» darvozaboni Senne Lammens barmoqlari uchi bilan to‘pga yetishga ulgurdi, ammo uning yo‘nalishini o‘zgartira olmadi.

Mezbonlar shundan keyin uyg‘ondi. Birinchi bo‘lim oxirida to‘p asosan «Everton» jarima maydoni atrofida bo‘ldi. 33-daqiqada Patrik Dorgu o‘ta qulay imkoniyatni qo‘ldan chiqardi, bo‘lim oxirida Brunu Fernandeshning 25 metr masofadan yo‘llagan zarbasi o‘ta xavfli chiqdi, ammo Pikford o‘zini ko‘rsatdi va mehmonlar tanaffusga hisobdagi ustunlikni saqlab qolgan holda yo‘l olishdi.

Ikkinchi bo‘limda ham mezbonlar shiddat bilan to‘xtovsiz hujum qilishdi, autsayder esa chuqur himoyalandi. «MYu» vaziyat ketidan vaziyat yaratdi: ikkinchi 45 daqiqalikning o‘zida 17 bor zarba yo‘llandi, to‘pga egalik qilish ko‘rsatkichi 77 foizni tashkil etdi. Kazemiro (ustun oldida turib to‘g‘ri zarba berolmadi), Meyson Maunt (olis burchakni nishonga olishda biroz adashdi), Brunu Fernandesh (yaxshi pozitsiyada turib to‘pni o‘ziga bo‘ysundira olmadi) o‘z vaziyatlarini yo‘qqa chiqarishdi.

Brayan Mbemo va Joshua Zirkzeyeda esa yaqqol golli vaziyatlar yuzaga kelgandi. Ulardan birinchisi 62-daqiqada yaqin burchakka xavfli zarba berdi – Pikford yana «Everton»ni qutqardi. Niderlandiyalik hujumchi esa 80-daqiqada qanotdan oshirilgan uzatmaga bosh bilan zarba berdi. Bu vaziyatda ham mehmonlar darvozaboni o‘z o‘rnida edi. Biroz o‘tib Zirkzeye yana bir bor Pikfordning mahoratini sinovdan o‘tkazdi. Ammo Jordan shu kuni qahramonlik ko‘rsatish uchun maydonga tushgandi va jamoasining g‘alabasini saqlab qoldi.

«MYu» qatorasiga uchinchi o‘yinda g‘alaba qozona olmadi va turnir jadvalining 10-o‘rnida qoldi, «Everton» ochkolari sonini 18 taga yetkazib, 11-o‘rinda joylashdi.