Ekologiya inspektoriga kuch ishlatgan Buvayda tumani hokimi o‘rinbosari ishdan olindi

Farg‘ona viloyati Buvayda tumani hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari Sayidjon Xizirov ishdan olindi. Bu haqda Toshkent shahrida ekologik vaziyatni yaxshilash yuzasidan kechiktirib bo‘lmaydigan chora-tadbirlarni amalga oshirish bo‘yicha tuzilgan maxsus komissiya Telegram kanalida xabar berildi.

Ma’lum qilinishicha, Sayidjon Xizirovning qonuniy faoliyat olib borayotgan ekologiya inspektoriga qarshilik ko‘rsatish holati yuzasidan mutasaddilar tomonidan ishchi guruh tuzilib, o‘rganish ishlari olib borilgan. O‘rganish ishlari natijasida hokim o‘rinbosari lavozimidan ozod etilgan.

Holat yuzasidan Bosh prokuratura rasmiy munosabat bildirdi. Unga ko‘ra, hokim o‘rinbosari Sayidjon Xizirov mansabdor shaxs bo‘la turib, mansab vakolatidan chetga chiqqan. U Buvayda tumani Nayman mahallasidan o‘tgan Nayman zovuri atrofidagi daraxtlar “D.S.” MChJ ishchisi tomonidan kesilayotganligidan xabar topib, oldini olish choralarini ko‘rayotgan ekologiya inspektorining qonuniy talablariga faol qarshilik ko‘rsatgan uni xizmat vazifasidan kechishga majbur qilgan hamda hodisa joyidan olib ketib, davlat va jamoat manfaatlariga jiddiy ziyon yetkazgan.

Holat yuzasidan Sayidjon Xizirov va boshqalarga nisbatan Jinoyat kodeksining 206-moddasi 1-qismi (Hokimiyat yoki mansab vakolati doirasidan chetga chiqish), 219-moddasi 2-qismi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 198-moddasi 2-qismi (Ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atilgan. Hozirda tergov harakatlari olib borilmoqda.

Jinoyat ishi tergovi shaxsan Bosh prokuror tomonidan nazoratga olingan.

Avvalroq Sayidjon Xizirov daraxt kesilishiga qarshi chiqqan ekologiya inspektoriga kuch ishlatgani xabar qilingandi: ekologiya inspektori Ahrorjon Niyozov aholi murojaatiga asosan manzilga borib, noqonuniy daraxt kesish holatini aniqlagan. So‘ngra daraxtlarni kesayotgan shaxsni to‘xtatib, belgilangan tartibda hujjatlarni rasmiylashtirmoqchi bo‘lgan. Voqea joyida bo‘lgan Buvayda tumani hokimi o‘rinbosari Saidali Xizirov esa unga jismoniy kuch ishlatib, chetroqqa sudrab ketgan.

Ma’lumot uchun, 45 yoshli Sayidjon Xizirov 2022 yildan Buvayda tumani hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari lavozimida ishlab kelayotgandi. 2021-2022 yillar Buvayda tumani hokimining sanoat, kapital qurilish va kommunal masalalari bo‘yicha o‘rinbosari lavozimida faoliyat yuritgan.