Toshkentdagi modernizm yodgorliklari YuNeSKO ro‘yxatiga kiritilishi mumkin

O‘zbekiston hukumati Toshkent shahridagi modernizm yodgorliklarini YuNeSKOning Umumjahon merosi ro‘yxatiga kiritish bo‘yicha materiallarni taqdim etadi.

Bu – Turizmni rivojlantirishga oid prezident qarorida ko‘zda tutilgan.

Qarorga ko‘ra, Toshkentni eng ko‘p mozaikalar bor shahar sifatida jahon miqyosida e’tirof etilishiga erishish vazifasi ham qo‘yildi.

Bundan tashqari, Samarqand shahridagi eng muhim tarixiy obektlarni bog‘lovchi 6,6 km uzunlikdagi turistik marshrutni tashkil etish bo‘yicha “Samarqandning meros yo‘li” loyihasi ham amalga oshiriladi.

Aholining turmush tarzi, savdo va xizmat ko‘rsatish shoxobchalari va kommunikatsiya tizimini tarixiy muhit bilan uyg‘unlashtirgan holda Xiva shahridagi Ichan-qal’a majmuasini jahonda yagona bo‘lgan immersiv va “aqlli” muzey-shaharga aylantirish ko‘zda tutilgan.

Yuqorida sanab o‘tilgan tadbirlar 2026-2028 yillarga mo‘ljallangan bo‘lib, ularning ijrosi uchun Madaniyat va san’atni rivojlantirish jamg‘armasi, Madaniy meros agentligi va qayta tashkil etilgan Turizm qo‘mitasi mas’ul bo‘ladi.